Баянзүрх дүүргийн 22 дугаар хороо, “Асайт” худалдааны төвийн хажууд “iPhоne-4 гар утсаа дээрэмдүүллээ” гэсэн мэдээлэл өчигдөр харьяа дүүргийн цагдаагийн байгууллагад иржээ. Мэдээллийн дагуу цагдаагийн алба хаагчид шуурхай шалгаж, тус дүүргийн Алтан өлгийн ... тоотод оршин суух Б-гийн гар утсыг оршин суух тодорхой хаяггүй Э нүүрэнд нь цохин дээрэмдэж зугтаасан гэдгийг илрүүлэн шалгаж эхэлжээ.

Мөн Сонгинохайрхан дүүргийн 13 дугаар хороо, наймдугаар байрны гадна иргэн Ө-г явж байх үед Сүхбаатар дүүрэгт оршин суух хаягтай Г, Архангай аймгийн Хайрхан сумын харьяат Д нар согтуурсан үедээ бүлэглэн зодож “Samsung galaxy S7” гар утсыг дээрэмдсэн хэрэг гарсныг мөн л харьяа дүүргийн цагдаагийн хэлтэс шалгаж байна.

Сүүлийн үед гар утас дээрэмдэх, машины арын хаалга онгойлгож түгжрэл дунд цүнхийг нь шүүрч зугтаах зэрэг булаах, дээрэмдэх хэрэг олон гарч байгаа учраас иргэд анхаарал болгоомжтой байж, гар утас, үнэт эдлэлээ ил авч явахаас зайлсхийх, мөн замын хөдөлгөөнд оролцохдоо арын хаалгаа түгжиж хэвшихийг цагдаагийн байгууллагаас анхааруулж байна.