Монгол Улсын “Хүнсний тухай хууль”, “Хүнсний бүтээгдэхүүний аюулгүй байдлыг хангах тухай хууль”, “Хүн амын хоол тэжээл” үндэсний хөтөлбөрийн хэрэгжилтийг хангах ажлын хүрээнд Сүхбаатар дүүргийн хүн амын хүнсний хангамжийг нэмэгдүүлэх, эрүүл аюулгүй хүнсээр хангах зорилтын дагуу өрхийн аж ахуй эрхлэгчдийн үйл ажиллагааг дэмжихээр нийслэлийн Үйлдвэр, хөдөө аж ахуйн газартай хамтран Швейцарийн хөгжлийн агентлагийн дэмжлэгээр Монголын фермер эмэгтэйчүүдийн ТББ-аас хэрэгжүүлж буй “Монгол ногоо” төслийг анхлан шинээр ногоо тарих иргэдийн дунд хэрэгжүүлж эхлээд байна.

Сүхбаатар дүүргийн Засаг даргын Тамгын газар төсөлд хамрагдах өрхүүдийг сонгох ажлыг хороодын Ажлын албатай хамтран зохион байгуулж, шинээр ногоо тарих сонирхолтой 40 өрхийг сонгон шалгаруулж, төсөлд хамрагдсан иргэдэд Ногоо тарих аргачлалд сургах анхан шатны сургалт дөрөвдүгээр сард болсон билээ.

Анхны сургалтаар хүлэмжид тарих хүнсний ногоог хэрхэн сонгох, ямар хугацаагаар үрсэлгээ хийх, хөрсний боловсруулалтыг яаж хийх, хүлэмжийг энгийн аргаар барих арга, мод, жимсний модны үрсэлгээг шилжүүлэн суулгах зэрэг арга, технологиудыг зааж сургасан.

Энэ удаа хоёр дахь шатны сургалтыг зохион байгуулж, ил талбайн төмс, хүнсний ногоо болон хүлэмжний ногооны арчилгаа, өвчин хортонтой тэмцэх аргачлалыг онол практик хослуулан явууллаа. Мөн энэ төсөлд хамрагдсан иргэдээс судалгаа авч амьжиргааны түвшин багатай, хөгжлийн бэрхшээлтэй 17 өрх, иргэнд Гала сортын төмсний үр, долоон төрлийн хүнсний ногооны үрийг үнэгүй олгож ногоо тарих ажилд нь дэмжлэг үзүүллээ.