Өнөөдөр Төрийн ордонд Эдийн засгийн байнгын хороо хуралдаж Үндэсний төлбөрийн системийн тухай хуулийн төсөл болон бусад холбогдох хуулийн төслүүдийн анхны хэлэлцүүлгийг хийсэн юм. Харамсалтай нь энэ хуулийг дөрөвхөн гишүүн хэлэлцэв. Байнгын хороо гэдэг хууль батлах эцсийн шат дамжлага биш хэрэгтэйг нь авч, хэрэггүйг нь хаяж, шүүсийг нь шахах ёстой шат дамжлага. Тиймдээ ч чуулганы хуралдааны танхимд хэлэлцсэн хуульд кноп дарахаас илүү байнгын хорооны хуралдаан хамгийн чухал нь байх учиртай.

Үүнийг нь МАН-ынхан сөрөг хүчин байхдаа Ардчилсан намаас хүсч, шаардаж, төрийн ажлыг төгөлдөр хуураар явуулж байна хэмээн шүүмжилдэг байлаа. Гэтэл эрх мэдэлд очсон тэд энэ үгээ, үйлдлээ мартаж орхижээ. Монгол төрийн хуулийг тоглоом шиг л баталж суулаа. Байнгын хорооны дарга нь ч эзгүй, орлож суугаа нь ч асуудлаа ойлгохгүй. Дөрөвхөн гишүүн зарчмын зөрүүтэй саналаар санал хураалт явуулж байх юм. Улмаар хуралдаа ирээгүй гишүүдийнхээ өмнөөс кнопыг нь дарах гэж хэдэн тал руу гүйлдсэн ч амжихгүй хоцорч орхино. Ингээд санал нь унахад хурал даргалж суусан Б.Баттөмөр энэ буруу зүйл болчихлоо. Дахиад санал хураая” гэх мэтээр төрийн ажлаар тоглоом хийх нь тэр. Хууль батлах хурал иймэрхүү байдалтай өрнөсөөр дөрвөн ч зарчмын зөрүүтэй саналаар дахин санал хурааж харагдсан юм.

Уг нь Эдийн засгийн байнгын хороонд Т.Аюурсайхан, Ж.Бат-Эрдэнэ, Л.Болд, Х.Болорчулуун, Ж.Ганбаатар, Ц.Даваасүрэн, Д.Дамба-Очир, Б.Дэлгэрсайхан, Б.Жавхлан, З.Нарантуяа, Д.Сумъяабазар, Д.Тэрбишдагва, Ч.Хүрэлбаатар, Б.Ундармаа, С.Чинзориг, Л.Элдэв-Очир, Л.Энх-Амгалан, Д.Эрдэнэбат, М.Оюунчимэг нарын 20 гишүүн харьяалагддаг. Эндээс ар гэрт нь ажил явдал гарсан Х.Болорчулуун, гадаадад томилолттой ажиллаж буй Ж.Бат-Эрдэнэ, З.Нарантуяа нарыг зайлшгүй шалтгаан хэмээн орхиж болно.

Харин бусад гишүүдэд эс үйлдлээрээ төрийн ажлыг үл ойшоолоо. Хуралдаанд суусан дөрвөн гишүүн нь Б.Ундармаа, Б.Жавхлан, Б.Баттөмөр, Б.Дэлгэрсайхан нар байсан. Байнгын хорооны дарга Д.Тэрбишдагвад ч төрийн ажлаас илүү ярилцлага өгөх нь чухал байсан бололтой. 65 гишүүнтэй үнэмлэхүй олонхи болж суучихаад төрийн ажлыг тэд иймэрхүү байдалтай л хийж байна. Ард түмнээ боддог, ажилдаа хариуцлагатай ханддаг Ардын намын хийх үйлдэл биш л байлтай.