Францын Ерөнхийлөгчийн шийдвэрлэх шатны сонгууль өнөөдөр өглөө орон даяар 08:00 цагт эхэллээ. Тус сонгуульд Үндэсний фронт намаас нэр дэвшигч Марин Ле Пен, эдийн засгийн сайд асан 39 настай Эммануэль Макрон нар тунан үлдсэн байдаг.

Санал хураалт орон нутгийн цагаар 19:00 цагт дуусгавар болж, санал тооллого 20:00 цагт албан ёсоор эхлэх аж. Францын эхний шатны сонгууль дөрөвдүгээр сарын 23-нд зохион байгуулагдсан байдаг. Тус сонгуульд нийтдээ 11 хүн өрсөлдсөнөөс Э.Макрон, Ле Пен нар хамгийн олон хувийн санал авсан юм.

Хоёр өөр үзэл баримтлалтай, эсрэг тэсрэг мөрийн хөтөлбөр дэвшүүлсэн нэр дэвшигчдийн хэн ялах нь маргааш гэхэд тодорхой болно.