БНСУ-ын анхны эмэгтэй Ерөнхийлөгч Пак Гын Хе авлига, албан тушаалаа ур­вуулан ашигласан зэрэг хэрэгт буруудаж суудлаасаа буу­сан. Улмаар түүний залгамж­лагчийг сонгох ээлжит бус Ерөнхийлөгчийн сонгууль энэ сарын 9-нд боллоо. Сонгуульд нийтдээ 11 эрхэм аль нэг улс төрийн хүчнээс нэр дэвшсэн юм. Гэхдээ урьдчилсан санал асуулгуудад Ардчилсан нам болон Ардын намын нэр дэвшигчид тэргүүлж байсан билээ.

Сонгуулийн санал хураалт өчигдөр 06:00 цагт орон даяар 3507 санал авах байрт зэрэг эхэлж, оройн 20:00 цагт өндөрлөж, албан ёсоор санал тооллогын ажиллагаа эхэлжээ.

Сонирхолтой нь,  Сонгуулийн Ерөнхий хорооноос 20:30 цагийн үед мэдээлэл хийж, санал тооллогын ажиллагаа 8.55 хувьтай байгааг зарлахад л БНСУ-ын дараагийн Ерөнхийлөгч хэн болох нь тодорхой болчихсон байв.

Томоохон мэдээллийн агент­лагууд гарцан дахь санал асуулгын дүнд үндэслэн Ардчилсан намын дарга Мүн Жэ Ин сонгуульд үнэмлэхүй ялалт байгуулж, ирэх таван жилд Азийн дөрөв дэх том эдийн засагтай бар улсыг тэргүүлэхээр болсныг зарласан юм.

Гарцан дахь санал асуулгын дүнгээр Мүн Жэ Ин 37.43 хувь, Эрх чөлөөт Солонгосын намын нэр дэвшигч Хон Жён По 28.92, төвийн үзэл баримтлалт Ардын намын нэр дэвшигч Ан Чёл Су 21.15 хувийн саналыг тус тус авчээ. Улмаар Мүн Жэ Ин ялалтаа зарлаж, “Ард түмний Ерөнхийлөгч байх болно” хэмээн амлажээ. Үүнээс гадна бусад нэр дэвшигчид ч, санал тооллогын дүн албан ёсоор гараагүй байхад ялагдлаа хүлээн зөвшөөрсөн юм. Хон Жун Пё оройн 22:30 цагийн үед буюу гарцан дахь санал асуулгын дүн гарсны дараа ялагдлаа албан ёсоор хүлээн мэдэгдэл хийжээ. Тэрбээр намын байрандаа хэвлэлийн хурал зарлан “Би намаа дахин сэргээж чадсандаа сэтгэл хангалуун байна. Сонгуулийн дүнг хүлээн зөвшөөрч байна” гэжээ.

БНСУ-ын 19 дэх удаагийн Ерөнхийлөгчийн сонгуулийн санал тооллогын ажиллагаа өчигдөр өглөө үүрээр 03:00 цагийн үед дууссан. Ингээд дүнг танилцуулахад Мүн 41.1 хувь, “Либериал Солонгос” намын нэр дэвшигч Хон Жун Пё 24.03 хувийн саналыг тус тус авчээ.

БНСУ-ын 19 дэх Ерөнхийлөгчөөр тодорсон  Мүн Жэ Ин өчигдөр Сөүл хотын Үндэсний Ассамблейн ордонд тангаргаа өргөлөө. Солонгосын шинэхэн төрийн тэргүүн хэд хэдэн бодлогыг дэвшүүлж байгаа аж. Гэхдээ тэдгээрээс хамгийн их анхаарал татаж буй нь Хойд Солонгосын талаар баримтлах бодлого юм. Тэрбээр Хойд, Өмнөдийн харилцааг шинэ шатанд аваачихаа сонгуулийн кампанит ажлын үеэр хэлсэн. Хойд Солонгосчуудын талаар БНСУ-ын эдүгээг хүртэл баримталж ирсэн харилцааг эрс өөрчилж, Пхеньяныг ганцаар­дуу­лахын эсрэг байхаа илэрхийлж байв.

Мөн Ерөнхий­лөгчөөр сонгогдвол хамгийн түрүүнд БНАСАУ-д айлчилна гэж амласан удаатай. Үүнтэй холбоотойгоор түүнийг Ерөн­ хийлөгч болмогц Японы зарим хэвлэлд АНУ-БНСУ-Япон гэсэн гурван улсын Хойд Солонгосын талаар баримтлах бодлогод өөрчлөлт гарч, байдал одоогийнхоос өөр төвшинд хүрч болзошгүй тухай мэдээлэл нийтлэгдсэн байлаа. Мүн пуужингийн довтолгооноос хамгаалах THAAD системийг БНСУ-ын нутаг дэвсгэрт байр­шуулах АНУ-ын шийдвэр зөв эсэхийг эргэн харах бодолтой байгаагаа илэрхийлсэн. Хэрвээ энэ бодлогоо хэрэгжүүлэх бол Сөүл-Вашингтоны харилцаа муудах магадлалтай юм.

Шинэхэн Төрийн тэргүүний Хойд Солонгосын талаар баримтлах бодлогыг түүний угсаа гаралтай холбон ойлгох боломжтой. Тодруулбал, Мүн Жэ Ин Хойд Солонгосын дүрвэгсдийн гэр бүлээс гаралтай билээ.  Мүн Жэ Ин 1953 оны арванхоёрдугаар сарын 22-нд Өмнөд Солонгос улсын Коджедо аралд  таван хүүхэдтэй айлын ууган хүү болон мэндэлжээ.

Түүний эцгийг Мүн Ён Хюн, харин ээжийг нь Кан Хан Ок гэдэг бөгөөд тэд 1950 онд Солонгосын хойг дайны хөлд нэрвэгдэх үед БНАСАУ-ын Өмнөд Хамгён аймгаас АНУ-ын “MEREDITH VICTORY” гэх ачааны хөлөг онгоцонд сууж, Коджедо арал руу ирсэн дүрвэгсдийн  нэг байсан гэдэг. Тэд Өмнөд Солонгост дүрвэн ирж суурьшаад, гурав дахь өвөлтэйгөө золгохдоо анхны үрээ өлгийдөн авсан нь Мүн Жэ Ин байжээ.

Мүн Жэ Ин гэж хэн бэ

“Кюнхэ” их сургуульд хуулийн чиглэлээр суралцсан. Оюутан байхдаа буюу 1975 онд их сургуульд хуулийн чиглэлээр суралцаж байсан Мүн Жэ Ин  Ерөнхийлөгчийн засаглалын эсрэг Ардчилсан хөдөлгөөнд оролцсон гэх шалтгаанаар баривчлагдан хоригдож байжээ. Тухайн үед БНСУ-ын Ерөнхийлөгчөөр эдүгээ хэд хэдэн хэрэгт буруутгагдан хоригдож буй экс Ерөнхийлөгч Пак Гын Хегийн эцэг Пак Чун Хе ажилладаг байв.

Үүний дараа 1982 онд тухайн үед өмгөөлөгч байсан Ну Мү Хёньтой хамтран хуулийн компаниа байгуулж байсан гэдэг. 2002 оны арванхоёр­дугаар сард түүний хамтран зүт­гэгч Ну Мү Хён Ерөнхийлөг­чийн сонгуульд нэр дэвшиж, Жэ Ин Бусан дахь сонгуулийнх нь штабын даргаар ажиллаж байсан гэнэ. Харин Ну Мү Хён 2003 онд БНСУ-ын 16 дахь Ерөнхийлөгчөөр сонгогдсоны дараа Мүн Ерөнхийлөгчийн Тамгын газарт орж ажилласан байна. Харин 2009 онд Ну гэрийнхээ хойд талын ууланд очиж, амиа егүүтгэн нас барахад ч Мүн Жэ Ин хамтран зүтгэгчээ эцсийн замд нь үдэн, оршуулгын ёслолыг удирдаж байжээ. 2011 оны есдүгээр сард “Инноваци ба хамтын ажиллагаа” компанийг үүсгэн байгуулж, төлөөлөгчөөр нь ажиллах болсон. Дараа жил нь буюу 2012 оны дөрөвдүгээр сард 19 дахь удаагийн бүх нийтийн сонгуулиар “Ардчилал эв нэгдлийн нам”-ыг үүсгэн байгуулж, нэр дэвшсэн байна. Ардчилсан нам дотооддоо эхний шатны сунгааг наймдугаар сарын 25-нд хийж, улс даяар 13 бүс нутгаас нэг нэг нэр дэвшигчийг тодруулжээ. Улмаар шийдвэрлэх шатны санал хураалтыг мөн оны есдүгээр сарын 16-нд товлосноор Мүн Жэ Ин 56.5 хувийн дэмжлэг хүлээж, “Ардчилсан нам”-аас Ерөнхийлөгчид нэр дэвших эрхтэй болж байв. Ингээд 2012 оны арванхоёрдугаар сарын 19-нд Ерөнхийлөгчийн сонгууль болоход Сэнүри намаас нэр дэвшигч Пак Гын Хетэй өрсөлдөн ялагдаж байжээ.

2016 оны дөрөвдүгээр сард болсон 20 дахь удаагийн бүх нийтийн сонгуульд тэр нэр дэвшээгүй. Харин энэ оны дөрөвдүгээр сарын 3-нд намаасаа Ерөнхийлөгчид нэр дэвшихээ зарласан байдаг. Тэр гэрлэсэн, хоёр хүүхэдтэй. Ромын католик шашинтай гэнэ.