Их Британийн Манчестер хотод байрлах “Манчестер Арена” концертын танхимд орон нутгийн цагаар энэ сарын 23-ны орой  21.33 цагийн үед томоохон хэмжээний дэлбэрэлт болсон. Тухайн үед залуу дуучин Арена Грандегийн аялан тоглолт болж байсан юм. Гэвч харамсалтай нь дэлбэрэлтийн улмаас 22 хүн нас барж, 50 гаруй хүн шархдан эмнэлэгт хүргэгдсэн байна. Дуучин бүсгүйн хувьд ноцтой гэмтэж бэртээгүй ч, болсон явдалд харамсан гашуудаж буйгаа нийгмийн сүлжээгээр илэрхийлэн, мөн аялан тоглолтоо цуцалж буйгаа мэдэгдсэн удаатай. 

 

Тус террорист халдлагыг хэт даврагч “Лалын улс” бүлэглэлийн гишүүн болох ливийн цагаач иргэн үйлдсэн нь эдүгээ ил болоод байгаа юм. Халдлага үйлдэгч амиа золиослосон байдаг. Одоогоор хэргийг хууль хяналтын байгууллага шалгаж байгаа.

 

Тэгвэл тус хэргийн мөрдөн шалгалтын талаарх нууц мэдээлэл АНУ-ын талд алдагдсан тухай өчигдөр орон нутгийн зарим хэвлэл дамжууллаа. Тодруулбал, өчигдөр Манчестер хотын цагдаагийн газраас мэдэгдэл хийж, хэргийн мөрдөн шалгалттай холбоотой нууц мэдээллийг хэд хэдэн удаа задруулсан тохиолдол гарсан тухай мэдээлжээ. Улмаар ийнхүү мэдээлэл нууц байдлаа алдах нь мөрдөн шалгах ажиллагаанд ноцтой хохирол учруулж байгааг онцолсон байна. “Би Би Си” агентлагийн мэдээлснээр тус улсын  цагдаа­гийн байгууллага АНУ-ын хол­бог­дох албатай мэдээлэл солилцох ажиллагаагаа зогсоосон аж. 

 

Их Британийн Терроризмтой тэмцэх албаны төлөөлөгч хэвлэлийн хурлын үеэр мөрдөгчдийн хамтын ажиллагаа дэлхий нийтийн аюулгүй байдал, итгэлцэл дээр үндэслэдэг гэдгийг онцлоод “Тэрхүү итгэлцэл нуран унасан тохиолдолд хамтын ажиллагаа ч доголдож, бидний ажлын гол хөшүүрэг болох  хохирогч, гэрч, тэдний гэр бүлийнхэний итгэл алдрах болно” хэмээжээ. 

 

Мөн “Томоохон хэмжээний терроризмын эсрэг мөрдөн шалгалт хийх явцад нотлох баримт болох зүйлийг зөвшөөрөлгүйгээр нийтэд задруулсан тохиолдолд үр дагавар нь асар хор хохиролтой” гэдгийг онцолсон байна. 

 

“Би Би Си” агентлагийн тухайд Их Британи АНУ-ын цагдаагийн холбогдох байгууллагатай мэдээлэл солилцох үйл явцыг хориглосон гэдгийг мэдээлсэн. Гэхдээ үүний шалтгааныг АНУ-ын Тагнуулынхан тус террорист ажиллагаатай холбоотой зарим мэдээллийг задруулсантай холбоотой” гэж тайлбарлажээ. 

 

Нөгөөтэйгүүр, цагдаагийнхан энэ хэрэгтэй холбогдуулан Манчестер хотын орчмоос хоёр эрэгтэйг баривчилжээ. Өмнө нь нэг эмэгтэйг баривчилсан гэх мэдээлэл байсан ч, халдлагатай холбоотой гэх нотлох баримт олдоогүй учир сулласан аж. Хамгийн сүүлд авсан мэдээллээр нийтдээ найман хүн баривчлагдаад байна.