Монгол Улсын  тав дахь Ерөнхийлөгчийг сонгох сонгууль өнөөдөр өглөө 07:00 цагаас эхэллээ. Энэ удаагийн сонгуульд парламентад суудалтай гурван намаас нэг нэг хүн өрсөлдөж буй. Өрсөлдөгч бүхэн өөр өөрийн мөрийн хөтөлбөрөө танилцуулж, зорилт зорилгоо тодорхойлж, 18 хоногийн турш сурталчилгаагаа хийсэн. Хамгийн сүүлд 24-ний өдөр МҮОНРТ-ээр мэтгэлцсэн. Хүн бүр өөр өөрийнхөө итгэл үнэмшил, үзэл бодлын дагуу дотроо сонголтоо хийчихсэн яваа нь ойлгомжтой.

Тэгвэл залуучууд аа, эрхэм сонгогчид оо, сонгуульдаа идэвхтэй оролцоорой.  Өглөө хэн хамгийн түрүүнд саналаа өгч байна вэ гэвэл хөгшид, ахмадууд. Залуучууд хаа газар саналаа жаахан идэвх муутай өгч байна гэсэн мэдээлэл байна. Тиймээс залуучууд минь саналаа идэвхтэй өгч, өөрсдийнхөө сонголтыг баталгаажуулаарай хэмээн уриалъя. Нөгөө талд иргэдийг саналаа битгий худалдаарай гэж уриалах байна. Сонгуультай холбоотойгоор мөнгө тараахаас авахуулаад янз бүрийн бохир аргаар санал худалдаж авах оролдлого хийж эхэлсэн.

Өнөөдөр гэхэд цэцэрлэгийн багш, ажилчдыг хүртэл санал өгсөн цагаан хуудсыг тодорхой тоогоор цуглуулж ирэхийг хүртэл даалгаж эхэлсэн сурагтай. Аль ч намаас, ямар ч хүнээс иргэн таны сонголтыг худалдаж авах оролдлого хийж магадгүй. Гэхдээ цөөхөн хэдхэн төгрөгөөр ирээдүйгээ, итгэл үнэмшлээ битгий худалдаарай хэмээн захимаар байна.

Энэ сонгуулийн сурталчилгааны үеэр сонголтгүй гэх сурталчилгаа, ухуулгыг залуучуудын дунд маш ихээр явууллаа. Энэ бол залуучуудыг сонгуулиа битгий өг гэж байгаатай ялгаагүй. Хэрвээ дахин сонгууль болбол улс орон олон тэрбум төгрөг дахин зарлагдах аюултай. Тийм болохоор залуучууд аа, саналаа идэвхтэй өгөөрэй.