Ерөнхийлөгчийн 2017 оны сонгуулийн дахин санал хураалт орон даяар өнөөдөр өглөөний 07:00 цагт эхэллээ. Энэ удаагийн санал хураалтад АН-аас нэр дэвшигч Х.Баттулга, МАН-аас нэр дэвшигч М.Энхболд нар  өрсөлдөж буй.

Хоёр дахь шатны санал хураалтад олонхийн санал буюу 50 дээр нэмэх нь нэг хувийн санал авч чадсан нэг нэр дэвшигч ялалт байгуулж, Монгол Улсын тав дахь Ерөнхийлөгч болно. Анхан шатны сонгуульд өрсөлдсөн гурван нэр дэвшигчийн хэн нь ч олонхийн саналыг авч чадаагүй учраас хоёр шатны санал хураалтыг зохион байгуулахаар СЕХ-оос шийдвэрлэсэн билээ.

Ингэхдээ хоёр дахь санал хураалтын бэлтгэл ажилд нийт долоон тэрбум төгрөг зарцуулсан юм. Хэрвээ энэ удаагийн сонгуульд иргэд идэвхтэй оролцохгүй бол эхлээд ирц хүрээгүй газруудад дахин санал хураалт явуулна. Ингэсэн ч ирц 50+1 гэсэн хувьдаа хүрэхгүй бол шинэ сонгуулийг зохион байгуулах билээ.

Өөрөөр хэлбэл, парламентад суудалтай улс төрийн хүчнүүд дахин нэр дэвшигчдээ тодруулна. Энэ удаагийн сонгуулийг хүчингүйд тооцож, сонгуулийг шинээр зохион байгуулахад дахиад л хэдэн тэрбум төгрөг үрнэ гэсэн үг. Харин энэ мөнгө бол иргэдийн халаас, татварын мөнгөнөөс гарч буй.

Тиймээс иргэд та бүхэн дахин санал хураалтдаа идэвхтэй оролцож, өөрсдийн саналыг баталгаажуулаарай. Манай улсын түүхэнд анх удаа дахин санал хураалт явагдаж байгаа билээ. Энэхүү үйл явдлаас харахад, Монголын ард түмний өмнө чухал үүрэг хариуцлага оногдож байна. Гэвч одоогийн байдлаар дахин санал хураалтын ирц хангалтгүй байгаа талаар зарим эх сурвалжууд онцолж байгаа юм.

Тэр тусмаа залуусын ирц хангалтгүй байгааг онцоллоо. Залуус аа, бид сошиал хуудсаараа дамжуулан хэтэрхий их улстөрждөг. Тэгсэн атлаа иргэний үүргээ биелүүлэх талаар хэтэрхий хайнга хандаж олон жил явлаа. Гэтэл бидний ирээдүйг хэдхэн өвөө, эмээ нар маань шийдсээр л байх аж. Монгол Улсынхаа ирээдүйн эзэн гэдгээ нотолж иргэний үүргээ биелүүлцгээе. Өнгө мөнгө харсан сонголт бус өөрийнхөө итгэл үнэмшлээр саналаа өгөөрэй хэмээн нийт иргэддээ уриалмаар байна.