Хорин настай өнгөт арьст залууг саатуулах үедээ цахилгаанаар цохиулах гэж байгаад андуураад галт зэвсэг ашиглан буудсан цагдаа эмэгтэй Ким Поттер ажлаасаа чөлөөлөгджээ. Мөн түүний ажилладаг цагдаагийн газрын дарга Тим Гэннон ажлаа өгсөн байна.

Хэргийг эргэн сануулахад, өнгөрсөн ням гарагт Данте Райт гэх залууг замын хөдөлгөөний дүрэм зөрчсөн хэмээн цагдаагийнхан машиныг нь зогсоосон байна. Бичиг баримтыг нь шалгахад түүний эрэн сурвалжлагдаж байгаа нь тогтоогджээ. 

Үүний дараа Райтыг баривчлах гэж оролдсон боловч тэрбээр зугтах оролдлого хийж, машин руугаа үсрэн суужээ. Цагдаа эмэгтэй жолооны ард байсан Райтыг зогсоох гэж цахилгаан цохиулагч ашиглах гэсэн боловч андуураад буудчихсан байна. Улмаар машин хэдэн метр орчим яваад өөр машиныг мөргөжээ. Цагдаагийн машин гүйцэж очоод хартал Райт амиа алдсан байжээ. Түүний хажууд нэг эмэгтэй зорчигч сууж явсан бөгөөд хөнгөн шархадсан байв. 

Дээрх үйл явдал өнгөрсөн жил Жорж Флойдын амиа алдсан Миннеаполис хоттой зэрэгцээ оршдог Брүүклин Сентер хотод болсон бөгөөд иргэд бухимдаж эсэргүүцлээ илэрхийлэн, үймээн самуун үүсгэсэн юм.