Монгол Улсын Шадар сайдын баталсан “Газрын тос олборлодог, газрын тосны бүтээгдэхүүн хадгалдаг, борлуулдаг байгууллага”-уудад гамшгаас хамгаалах болон гал түймрийн улсын хяналт шалгалтыг 2016 оны наймдугаар сарын 01-26-ны өдрүүдэд зохион байгуулжээ. Тус шалгалтад нийт 38 объект хамрагдаж, галын аюулгүйн дүрэм, норм, стандартын холбогдох заалтыг зөрчсөн 325 тохиолдлыг илрүүлсэн байна.

Мөн 51 зөрчил буюу 15.6 хувийг газар дээр нь арилгуулан, бусад зөрчлүүдийг арилгуулахаар Гал түймрийн улсын хяналтын байцаагчийн заавал биелүүлэх албан шаардлага 28, мэдэгдэл хоёр, танилцуулга найм, ажиллагаа зогсоох тогтоол нэг, дүгнэлт гурвыг бичиж, байгууллагын шийдвэр гаргах эрх бүхий албан тушаалтанд хүргүүлсэн аж. Түүнчлэн Монгол Улсын Галын аюулгүй байдлын тухай хуулийн 25 дугаар зүйл, Захиргааны хариуцлагын тухай хуулийн 25 дугаар зүйлийн 251 дэх заалтыг үндэслэн нийт зургаан субъектыг таван сая зургаан зуун далан зургаан мянган төгрөгөөр торгов. Батлагдсан удирдамжийн шалгалтын хугацаанд 16 байгууллагын нийт 188 хүнд гамшиг болон галын аюулаас урьдчилан сэргийлэх чиглэлээр хоёр цагийн танхимын сургалтыг зохион явуулсан байна.

Гал унтраах тактикийн сургуулийг Ойн бирж компанийн газрын тосны бүтээгдэхүүний агуулах, шатахуун түгээх станц 39 дүгээр салбар, Мон газ сервис ХХК-ийн агуулах,  Сод монгол групп ХХК-ийн шатахуун түгээх станц 32, 37, 56 дугаар салбар, Ник Петровис ХХК-д зохион байгуулжээ. Мөн Багануур нефть хангамжийн салбар, Транс гайд сервис ХХК-ийн газрын тосны бүтээгдэхүүний агуулах зэрэг 9 объектод зохион байгуулж, тус тактикийн сургуульд Онцгой байдлын албаны гал унтраах зориулалтын 18 автомашин, нийт 262 албан хаагч, ажилтан, иргэд хамрагдсан оролцсон байна.