Нийслэлийн Засаг даргын Тамгын газраас баар, цэнгээний газруудыг 00:00 цагт хаах талаар өчигдөр мэдээлэл хийлээ. Энэ үеэр Улаанбаатар хотын Захирагчийн ажлын албаны Хүнс, худалдаа үйлчилгээний хэлтсийн дарга О.Нарантуяагаас зарим зүйлийг тодрууллаа.

-Баар, рестораныг шөнийн 00:00 цагт хаана гэсэн мэдээлэл олон нийтийн сүлжээгээр явах болсон. Энэ мэдээлэл үнэн үү. Дэлгэрэнгүй мэдээлэл өгөхгүй юу?

 -Олон нийтийн сүлжээ, зарим хэвлэл мэдээллээр баар, рестораны ажиллах цагийн хуваарь өөрчлөгдсөн гэх ташаа мэдээлэл явж байна. Хуучин Э.Бат-Үүл даргын захирамжийн дагуу 04:00 цаг хүртэл ажиллаж байгаа. Түүнээс биш шөнийн 00:00 цаг хүртэл ажиллана гэдэг худал мэдээлэл. Үүнийг дахин хэлмээр байна. Баар, ресторанууд хуучин цагийн хуваарийн дагуу ажиллах болно.

-Иргэдээс шөнийн цэнгээний газрыг 04:00 цаг хүртэл ажиллуулах нь амгалан тайван байдал алдагдуулж байна гэсэн гомдол гаргаж байгаа. Энэ талаархи гомдол, санал ирсэн үү?

-Тийм. Иргэд, оршин суугчдын зүгээс баар, рестораны газрыг 04:00 цаг хүртэл ажиллуулах байх тухай гомдол ирсэн. Ингэж ажиллах нь иргэдийн амгалан тайван байдлыг алдагдуулж байна. Тиймээс 00:00 цаг хүртэл ажиллуулж өгөөч гэсэн гомдол ирсэн. Бид иргэдийн гомдол саналын дагуу судалгаа хийлээ. Мөн аж ахуйн нэгжүүдээс ч санал авсан. Тийм учраас ингэж шийдсэн юм.

-Тэгэхээр иргэд 04:00 цаг хүтэл ажиллахыг зөвшөөрсөн гэсэн үг үү?

-Бид судалгаагаа залуу, дунд, ахмад гэсэн гурван чиглэлээр явуулсан. Судалгаанаас харахад 50, 50 хувьтай байгаа юм. Гэхдээ иргэдийн ихэнхи нь 04:00 цаг хүртэл үйл ажиллагаа явуулах нь зүйтэй гэсэн санал ирүүлсэн. Гэтэл нөгөө талд аж ахуйн нэгжүүд 04:00 цаг хүртэл үйлчилгээ явуулах хүсэлтэй байгаа. Хоёр талтай асуудал юм.  Бид  удирдлагын зөвлөлийн хурлаар хэлэлцэж байж эцсийн шийдвэрийг гаргана.

-Цэнгээний газрууд 04:00 цаг хүртэл ажиллах нь гэмт хэргийн гаралтыг ихэсгэх талтай юу?

-Үгүй. Цэнгээний газрууд  04:00 цаг хүртэл ажилладаг болоод хоёр жил болж байна. Энэ хугацаанд гэмт хэргийн гаралт буурсан. Баар, ресторан шөнө болтол ажиллах нь гэмт хэрэг үүсэх магадлалтай гэж зарим хүмүүс бодох байх. Гэхдээ шөнийн цэнгээний газруудыг 04:00 цаг хүртэл ажиллах захирамж гарснаас хойш гэмт хэргийн гаралт ихэссэн зүйл алга. Одоогийн байдлаар гэмт хэргийн гаралт буурсан байна. Мөн аж ахуйн нэгжүүдийн орлого нэмэгдсэн. Гэхдээ үүнийг тойрсон санал гомдлууд бий. Тухайлбал, орон сууцны нэгдүгээр давхарт амьдардаг иргэдээс ирэх гомдол нэмэгдсэн.

-Одоо хуучин захирамж үйлчилж байгаа юу?

-Тийм. 2015 оны долдугаар сарын 9-нд гаргасан захирамжийн дагуу баар, цэнгээний газрууд шөнийн 04:00 цаг хүртэл үйл ажиллагаагаа явуулж байна. Одоогоор шинэ захирамж гараагүй.

-00.00 цагт хааснаар далд гэмт хэрэг бий болно гэж мэргэжилтнүүд үзэж байна. Энэ тал дээр тайлбар хэлбэл?

-Ахуйн архидалт, архийг шаглах асуудал ихээр гарна.  Тухайлбал, шөнийн цэнгээний газруудын цагийг хязгаарласнаар ТҮЦ болон таксинд архи зардаг. Өөрөөр хэлбэл, нууцаар архи зарах нь ихэсдэг. Улмаар гэмт хэрэг эрс нэмэгддэг гэсэн цагдаагийн байгууллагын судалгаа ч бий. Сүүлийн хоёр жилд харьцангуй энэ төрлийн гэмт хэрэг багассан хандлагатай байна.

-Одоогийн байдлаар нийслэлийн хэмжээнд үйл ажиллагаа явуулдаг хэчнээн баар байгаа вэ?

-Нийслэлийн хэмжээнд баар, рестораны чиглэлээр үйл ажиллагаа эрхэлдэг 1500 гаруй аж ахуйн нэгж байна. Эдгээр газрууд үүрийн 04:00 цаг хүртэл ажилладаг.

-Шинэ захирамж хэзээ гарах вэ?

-Удирдлагын зөвлөлийн хурлаар хэлэлцсэний дараа эцсийн шийдвэрийг гаргана. Тэр болтол хариу өгөх боломжгүй.