Монгол ардын намынхан сонгуульд ялснаасаа хойш буюу 7, 8, 9 дүгээр сарын хүүхдийн мөнгийг өгөөгүй байгаа. Нэг хэсэг бараг өгөхөө болино гэж хүртэл ярьсан. Харин сүүлийн үед гурван сарын мөнгийг нэг дор хүүхдүүдийн данс руу хийх юм ярив. Угаасаа өрхийн амжиргааны төвшний шинэчилсэн бүртгэл хийж, хүүхдүүдийн 60 хувьд нь л мөнгө өгөх юм гэсэн. Үлдсэн 40 хувьд нь хүүтэй гурван жилийн дараа өгөхөөр амласан. 

За тэр хүүтэй өгөх энэ тэр “үлгэр” 2020 оны сонгуулийн өмнө амар сайхан жаргаж магадгүй л байх. Харин одоо 60 хувьд өгөхөөр болсон юм бол ажлаа шуурхайлаач ээ. Есдүгээр сард багтаагаад өгнө л гэсэн. Бүр өчигдөр буюу даваа гарагт данс руу нь хийчих юм яриад байсан, байдаггүй. Ядаж байхад есдүгээр сар ердөө гурав хоногийн дараа дуусах гээд байдаг. Гэтэл иргэд хүүхдийн мөнгө буухыг тэсэн ядан хүлээж байна. Өнөөдөр Монголын иргэд яаж амьдарч байгаа билээ дээ. Өр тавьж, өрөө дарж, хоногийн хоолоо аргацааж амьдарч байгаа хүн маш олон байна. 

Ядахад эрх баригчид гурван сарын мөнгийг бөөнөөр нь өгнө гээд хэлчихсэн. Хоёр, гурван хүүхэдтэй айл гэхэд 100-200 мянган төгрөгтэй болох гээд байдаг. Хүүхдийн мөнгөнөөс өөр орлогогүй хүмүүст бол их юм. Ядаж хүүхдүүдийнхээ хичээл номд хэрэгтэй ганц нэг зүйлээ авчихна. Сарын хүнсээ ч бэлтгэнэ. Ер нь юу ч авсан болохоор л мөнгө. Эрхтэн дархтан, эвэртэн тууртнуудад бол нэг аятайхан газар хоол идэж хүрэхээргүй л мөнгө байх. Харин ядарсан иргэдэд чинь бол худлаа хэлсэн хүнд улирлын хоол хүнсний мөнгө шүү. Тийм болохоор үнэхээр өгөх гээд байгаа бол хурдан өгөөч ээ.

Иргэд хүүхдийн мөнгө орно гээд байн байн дансаа шалгаж, хонох нь холгүй АТМ болгон дээр урт дараалал үүсгэж байна. Зарим нь банкинд дугаарлаад, асуугаад, сүүлийн хэд хоног үймэлдэж байгаа. Гэтэл өнөөх мөнгө нь ордоггүй. Чадахгүй бол яах гэж ингэж ядарсан иргэдээрээ тоглоно вэ. Эсвэл энэ чинь орон нутгийн сонгуулийн өмнөх шоу юм уу. Хэд хоног гүрийлгэж байгаад, аравдугаар сарын дундуур хаанаас ч юм хэдэн төгрөг олоод, хүүхдийн мөнгө гээд өгөх гээд байна уу. Тийм бол яг хэзээ, хэдэн сарын мөнгөө өгөхөө яг үнэнээр нь хэлчих хэрэгтэй биз дээ. Аравдугаар сарын 15-нд яг өгнө өө ч гэдэг юм уу.

Хэрвээ тэгж тооцоогүй, үнэхээр өгөх гэж байгаа юм бол хурдхан өгчихмөөр байна. Тэгэхгүй бол энэ долоо хоногжингоо иргэд хүүхдийн мөнгө буухыг хүлээж, банкинд дугаарлаж, АТМ сахиж өнжих гээд байна.