Дорнод аймгийн Халх гол сумын Ялалт багийн нутагт Петрочайна дачин тамсаг компанийн 21 дүгээр талбай олборлолтын үйл ажиллагаа явуулдаг. Орон нутгийн удирдлагууд болон нутгийн иргэдийн зүгээс хамгийн их гомдол дагуулдаг газар. 

Балагтай энэ газрын тухай бараан мэдээлэл өчигдөр “Петрочайна Дачин Тамсаг” компани олон тооны үхсэн зээрийг шөнийн цагаар нууцаар булж ул мөрөө баллах гэж байсан тухай мэдээлэл цахим сүлжээнд гарсан. Улмаар УУХҮЯ, БОАЖЯ-ны хамтарсан шалгалтын ажлын хэсэгт багтсан иргэний нийгмийн байгууллагын төлөөллүүд ажиллаж байгаа гэнэ.

Дээрх асуудлаар ажлын хэсгийнхэнтэй дотогш хамт орохыг хүссэн иргэн Б.Цэгмидийг хамгаалалтын албаныхан оруулахгүй гэж хүч хэрэглэн толгой, биед цохих бүр өшиглөж, толгой дээр нь өвдөглөж байх жишээтэй. Энэ дүр зураг АНУ-ын цагдаагийн офицер, 44 настай Дерек Чоувин нь баривчилгааны үеэр Жорж Флойдыг гэх өнгөт арьс иргэнийг гавлаж, газар хэвтүүлэн хүзүүн дээр нь өвдөглөн найман минут гаран байсны улмаас сэжигтэн газар дээрээ амьсгал хураасан. Бүхэл бүтэн найман минутын турш Жорж Флойд амьсгалж чадахгүй байгаагаа учирлан, амь аврахыг гуйсан боловч цагдаагийн офицер өвдгөө огтхон ч хөдөлгөөгүй юм. Хохирогч Жорж Флойд нь хүнсний дэлгүүрт хуурамч 20 ам.долларын дэвсгэртээр тооцоо хийсэн хэргээр баривчлагдах явцдаа амь үрэгдсэн. Энэ хэрэг гэрчүүдийн хийсэн видео бичлэгээр цахим сүлжээнд тарж, олон нийтийн хүчтэй эсэргүүцэл өдөөсөн билээ. 

АНУ-ын иргэд “Хар арьстан ч амьдрах эрхтэй” хэмээн эсэргүүцлээ илэрхийлж тэр ч бүү хэл нэлээд тооны жагсагчид Вашингтон хотноо Цагаан ордны гадна цуглан арьс өнгөөр ялгаварлах үзлийг эсрэг тэмцэж байсан юм. Хэн нэгнийхээ төлөө дуу хоолоо сэтгэл зүрхээрээ нэгдэж чаддаг ард түмэн ийм л байдаг. 

Саяны дурдсан жишээ шиг үйл явдал манай төрийн гар хүрч чададгүй тэр компанийн гадаа энэ цаг мөчид давтагдлаа. 

Энд бас нэгэн жишээг хэлэхэд "Нутгаа аврах Чойбалсанчуудын нэгдэл” ТББ-ын тэргүүн Г.Адилбиш “Төрийн байгууллагууд  тэдний зөрчлийг мэдээд байгаа атлаа дуугардаггүй, ажлаа хийдэггүй. 2018 оны байдлаар ус ашиглах дүгнэлттэй хэрнээ гэрээ хийгээгүй, байгаль орчны менежментийн төлөвлөгөөгүй, хоёр жил тутам орох ёстой аудит нь ороогүй, химийн хортой хог хаягдлын стандарт зөрчигдсөн, нөхөн сэргээлт хийдэг ч орон нутагт хүлээлгэж өгдөггүй гээд олон зөрчил илэрсэн. Химийн хортой хог хаягдал газарт нэвчсэн байхад жишим ч үгүй “жоохон цоорчихож”  гээд байж байсан. Шалгах гээд очсон төрийн байгууллагууд компанийн хашаа руу нэвтэрч чадахгүй гадаа нь зогсож, хашааны наана, цаанаас уулзаж байгаа юм. Монголын төрд толгой алга” хэмээн хэлж байсан удаатай.

Өнөөдөр энэ байдал яг л хивэндээ бурхангүй газрын бумба галзуурна гэдэг шиг Петрочайна дачин тамсаг компани тэр газарт дураараа дургиж дунд чөмгөөрөө жиргэж байна.

Орон нутгийн төрийн байгууллага битгий хэл холбогдох яамд нь хүртэл засаж залруулж чадахгүй байгаа энэ асуудлыг хэн шийдэх вэ. Тэнд тэмцэж байгаа иргэд нь бие мах бодиор хохирч, элдвээр хэлүүлсээр л байх уу. Тухайн нутгийн уугуул иргэд тэр нутгийн эздийн тавьсан шаардлага, сэмэрсэн сэтгэлийн нохой хуцах чинээ тоохгүй байгаа тэр Петрочайна дачин тамсаг компани хэний үгийг сонсох вэ. 

Эх сурвалж: Монголын Мэдээ Сонин
​​​​​​​2023 оны гуравдугаар сарын 28. Мягмар. №049 (5777)