Монгол Төрийн ордны хашааг өнгөрсөн өвлийн жагсагчид нэгийг нь гэмтээснээс үүдээд бүгдийг нь засч сэргээх шаардлагатай болж  сая явган хүний замыг хааж байна хэмээн шүүмжлүүлэн засч сэргээж хачин сайхан болгов. Ер манайхан алив ажлын ач холбогдол, эцэс сүүлийг харалгүй яаран шүүмжилдэг нь энэ. Ийм сайхан, хэдэн зуун дамжих том бүтээн байгуулалт хэрэм босгох гээд байхад явган хүний зам мэт ч яамай л байхгүй юу. Яахав өчнөөн тэрбумын өртөгтэй энэ нүсэр ажлыг хэдхээн хоногт амжуулсан ч Польшийн Ерөнхийлөгч Анжи Дуда гэдэг эрхэм ирэх гээд их бүтээн байгуулалтын ажлыг нь саатуулж садаа болсноор яаран сандран ногооноор будсаныг нь олон нийт өнжин хонон шүүмжлэв. 

Ер нь ийм их  хөрөнгө мөнгөөр хийж байгаа, алсын хараатай, төрийн ордон, эрхэм түшээдээ аюул ослоос хамгаалах, энэ их асар том бүтээн байгуулалтын ажил хэд гуравхан хоногт ийм амархан амжина гэж төсөөлж байгаа фейсбүүкчдийн л буруу байхгүй юу. 

Одоо гаднын зочин, Польшийн Ерөнхийлөгчийг яваад өгөхөөр ахиад бас хэдэн тэрбум төгрөг зараад үүнийг чинь гантигаар бүрээд, алтаар чимээд хачин сайхан болгочихно, адгаад байх ер хэрэггүй. 

Харин манай олон нийтийн сүлжээнийхэн эх орныхоо хөгжил цэцэглэл, энэ том бүтээн байгуулалт, сайн сайхныг шүүмжилж байхын оронд энэ үнийн өсөлт ханшийн уналтын талаар хааяа нэг үг ганхийлгэчихэж баймаар юм биш үү. 

Энэ төр засаг, Ерөнхийлөгч маань намынхаа хулгайч дээрэмчидтэй тэмцээд сэлэм эргүүлээд, Засгийн газар, Ерөнхий сайд маань авлигатай тэмцээд амжиж завдахгүй байхад бид ийм аар саархан нэг хашааны өнгө будаг яриад сууж байх зуух монгол төгрөгийн ханш өдрөөс өдөрт унаж муудсаар л байна. 

Засгийн газар, Ерөнхий сайд Л.Оюун-Эрдэнэд зав боломж нь байсан бол ноён долларын ханшийг аль хэдийнээ дараад авах л байхгүй юу. 

Тэртэй тэргүй энэ МАН-ын гишүүн, нам төрийн  нэрт зүтгэлтэн, “Болор цом”-ын эзэн яруу найрагч, кино зохиолч найруулагч, аугаа жүжигчин, “маршал”, УИХ, Засгийн газрын гишүүн асан Ж.Мөнхбат  нь бүр тэртээ 2016 онд “нэг ам доллар 17 боодол нэгтийн дэвсгэрттэй тэнцлээ шүү” хэмээн анхааруулаад байсан болохоор манай өнөөгийн төрийнхөн мэдэхийн цаагуур мэдэж, анхааралдаа аваад засч залруулах гээд л үзэж тарж байгаа. 

Ганцхан гайтай коронавирусийн халдвар, цар тахал, тэртээ Украины дайн зэргээс болоод л бараа бүтээгдхүүн, түүхий эдийн үнэ өсөөд байгаа болохоос биш манай энэ төр, засгийн газрын буруу гэж юу байхав.Ядаж байхад Украин, Орос хоёр тэнд дайтаад манай удирдагчдын сэтгэлийг зовоогоод амжил завдал өгөхгүй байгаа. 

Тэгээд ч манай олон нийтийн сүлжээнийхэн, алдарт фейсбүүкчид  энэ бүхнийг ойлгоод үнэ ханшийн талаар огт гомдоллохгүй, засаг төрөө, Ерөнхийлөгч, Ерөнхий сайд аа дэмжээд л элдэв санал асуулгаар энэ л хүмүүстээ хамгийн өндөр оноо өгөөд, сайнаар яриад, сурталчлаад  байгаа. 

Төрийн ордны ногоон хашааг л баахан шүүмжлэх юм. Уг нь бол нийслэл хотын ногоон байгууламж жилээс жилд хорогдож, ихэнх газрын зүлгийг бетонон хавтангаар бүрээд саарал болгочихсон болохоор хотыг ногооруулахад ногоон өнгө ч бас чухал шүү дээ. Энэ мэтийг ойлгохгүй фейсбүүкчид л хэл амаа билүүдээд байгаа нь энэ л дээ. 

Тээр жил дээ Сүхбаатарын талбайг аюул ослоос хамгаалах гэж нийслэлийн засаг захиргаанаас шоо хэлбэрийн гантиг чулуу тавьсныг шүүмжилсээр байгаад алга болгож  нийслэл хотоор аялан явдаг болгочихсон шигээ Төрийн ордны минь хамгаалалтын энэ сайхан хашааг бас буулгуулчих гээд байхын хэрэг юун билээ.

Эх сурвалж: Монголын мэдээ сонин @Дугаарын60мөр

2023 оны дөрөвдүгээр сарын 25. Мягмар. №071 (5799)