Эдийн засгийн бодлого, өрсөлдөх чадварын судалгааны төвийн Ерөнхий захирал, эдийн засагч Б.Лакшми Монголын үндэсний худалдаа аж үйлдвэрийн танхимын Ерөнхийлөгчид өрсөлдөх юм байна.

Тэрээр Орос-Монголын хамтарсан 3-р сургууль, ХБНГУ-ын Берлин хотын Эдийн засаг, тенхикийн дээд сургуулийн магистр, Дрезден хотын Эдийн засаг, Техникийн дээд сургуулийн  бакалавр, ХБНГУ-ын Форст хотын мэргэжлийн боловсролын сургуулийн эдийн засгийн шинжээч мэргэжлийг тус тус дүүргэжээ. Сургууль төгссөнөөсөө хойш “Мигма” ХХК-д маркетингийн менежер, “Наран Моторс” ХХК-ийн захирал, сүүлийн 10 орчим жил Эдийн засгийн бодлого, өрсөлдөх чадвар судалгааны  төвийн Ерөнхий захирлаар ажиллаж байна.

Мөн олон улсын байгууллага болон компаниудад зөвлөх хийдэг. Герман, англи, орос хэлтэй, өндөр боловсролтой тэрээр Монголын эдийн засгийн талаар шинжлэх ухааны үндэстэй, ул суурьтай, судалгаатай мэдээллийг өгдөг, төр засгийн бодлого, шийдвэрт анализ хийж чаддаг топ эдийн засагчдын нэг юм. Б.Лакшми МҮХАҮТ-ийн Ерөнхийлөгчид тохирох хамгийн зөв нэр дэвшигч ч байж мэднэ. МҮХАҮТ-ийн шинэ Ерөнхийлөгч энэ сарын 20-нд тодрох юм. Бизнесийнхний хүрээнд түүнийг эрх ашгийн зөрчилгүй, аль нэг компанийн нөлөөнд автахгүй учраас хамгийн боломжтой хувилбар гэж үзэж байгаа аж. 

Түүнээс гадна MCS-ийн дэд ерөнхийлөгч Д.Энхтүвшин, “Алтандорнод Монгол” компанийн захирал Т.Ганболд,  Мобикомын захиралаар ажиллаж байсан С.Болор, Коёотэ ХХК-ийн захирал Д.Бямбасайхан, “CEO” клубийн ерөнхийлөгч Б.Гантулга, "Эм ти эм сити инженеринг"-ийн  Г.Мөнхсайхан нар нэр дэвшихээр м эдээгдэж байгаа сурагтай.