Оросын сөрөг хүчний төлөөлөгч, Путиныг гол шүүмжлэгч блогч, улстөрч  Алексей Навальный хоёрдугаар сарын 16-нд шоронд салхилж байх үедээ бие нь муудан, ухаан алдаж түргэн тусламж дуудсан боловч тусламж авч чадалгүй нас барсан байна.

Түүний ял эдэлж байсан Ямало-Ненецкийн тойргийн Олон нийтийн ажиглагчдын төлөөлөгч Данила Гонтарь тэрбээр эрүүл мэндийнхээ талаар ямар нэг гомдол хэлж байгаагүй гэж мэдэгджээ.  Блогч  47 настай Алексей Навальный нас барахынхаа өмнөх өдөр шүүх хуралд онлайнаар оролцох үедээ  биеийн эрүүл мэнд хэвийн байгаа гэж мэдэгдэж байжээ.

Алексей Навальныйг хэд хэдэн гэмт хэрэг өдүүлсэн хэмээн 19 жилийн хорих ялаар шийтгэн Ямало-Ненецкийн автономит тойргийн засан хүмүүжүүлэх “Полярный волк”-3 хорих ангид ял эдлүүлж байсан юм.

НАВАЛЬНЫЙН ҮХЛИЙН ТАЛААР ОРОСЫН БОЛОН ГАДААДЫН ХЭВЛЭЛД

“Тэрслүү” улстөрч Навальныйн үхэлд Оросын Ерөнхийлөгч Владимир Путин буруутай хэмээн өрнөдийн хэвлэлүүд бичиж байна. Харин оросын хэвлэлүүд болохоор түүний үхлийн талаар тодорхой мэдээлэхгүй, зөвхөн товч мэдээ л явуулж байна. Төрийн мэдлийн хэвлэлүүд болохоор нэртэй шүүмжлэгч, сөргөлдөгчийн нь үхэл Путины хувьд нэг их таатай зүйл биш гэж бичиж байгаа юм байна.

 Гадаадын хэвлэлүүд

Дэлхийн тэргүүлэх хэвлэлүүд Алексей Навальныйн зургийг тэргүүн нүүрэндээ тавин мэдээлж байна. New York Times сонин улстөрчийн зургийг биш харин Оросын олон хотод түүний дурсгалыг хүндэтгэн цэцэг тавьж байгаа зургийг тэргүүн нүүрэндээ тавьжээ. Навальныйн дурсгалыг хүндэтгэх гэсэн олон хүнийг цагдаагийнхан саатуулж байна хэмээн францын “Либерасьон” хэвлэлд бичсэн байна.

“Навальныйн үхэл нь АНУ, Оросын хоорондох харилцааг хурцатгалаа” хэмээн NYT хэвлэлд бичээд АНУ-ын Ерөнхийлөгч Жо Байден Навальныйн үхэлд Путин болон түүний эргэн тойрныхныг буруутгалаа  гэжээ.

Сонин цааш нь “Байден нэг удаа  Навальный шоронд нас барвал "сүйрүүлэхүйц" үр дагаварт хүрнэ гэж Путинд хэлж байсан ч Орос улс Украиныг эзлэн түрэмгийлсний хариуд сүүлийн хоёр жилийн хугацаанд авсан хориг арга хэмжээ болон бусад арга хэмжээ хэрэгжүүлснээс өөр хийж чадах зүйл бага юм гэдгээ хүлээн зөвшөөрсөн” гэж үргэлжлүүлсэн байна.  Өмнөх өдөр нь Лондонгийн их сургуулийн коллежийн Оросын улс төр судлаач  дэд профессор, Навальныйн улс төрийн намтар түүхийг зохиогч Бен Нобль ВВС агентлагт  Украины дайны улмаас өмнө нь тавьсан хориг арга хэмжээнүүдээс өөр илүү ноцтой арга хэмжээг төсөөлөхөд хэцүү байна гэж байсан юм.

Навальныйн нас барахаас өмнө Аюулгүй байдлын талаарх Мюнхений бага хурал дээр тэр энэ намар болох АНУ-ын ерөнхийлөгчийн сонгуульд Трамп ялах юм бол Америк Украинд туслахаа зогсоож, Европ тэр чигтээ Пужтинтай халз тулж үлдэнэ гэж байсан юм.

Британийн Daily Telegraph сонин өрнөдийн улс орнуудын удирдагчид Навальныйн нас барсанд хэрхэн хандаж байгаа тухай бичвэр эхний нүүрэндээ тавьжээ. АНУ-ын Ерөнхийлөгч Байденаас гадна сөрөгч хүний төлөөлөгчийн үхэлд Урсула Фон дер Ляйен, Францын Эмманюэль Макрон, Латвийн Эдгарс Ринкевичс, Украины Владимир Зеленский нар мөн Путиныг буруутгаж байгаа гэнэ.

Өрнөдийн олон хэвлэл хоёрдугаар сарын 17-ны дугаартаа амь алдсан улстөрч нь Оросын улс төрийн амьдралд чухал үүрэгтэй нэгэн байсныг онцолжээ. Германы Tagesspiegel сонин Навальныйн тухай өгүүллээ “Тэрслүү” гэж нэрлээд түүнийг оросын шинэхэн түүхийн сөрөг хүчний гол төлөөлөгч гэж нэрлэсэн байна.

“Чанга хатуу дэглэмтэй хорих ангид ганцаарчлан хоригдож байсан хэдий ч шоронгоос хүртэл олон нийтийн сүлжээгээр, эрх баригчдаас айлгүй  дуу хоолойгоо цуурайтуулж байсан хүчтэй хоолойгоо алдсан нь Оросын сөрөг хүчин болон Путиныг эсэргүүцсээр байгаа түрэмгий  дайны эсрэг тэмцэгчдэд хүнд цохилт боллоо” гэж  америкийн нөлөө бүхий Washington Post сонинд бичжээ.

Мөн  чухам юу болсон, яагаад тэр гэнэт нас барсан гэдгийг удахгүй олж мэднэ, энэ нь цаашид юу болоход чухал ач холбогдолтой гэсэн байна.

Энд бичсэн эмгэнэлд Навальный бол “улс төрийн ер бусын эр зоригтой, ард түмний тэгш эрх, гутралын төлөө эр зоригтой тэмцэгч бүхий л орос даяар нэрд гарсан, хэдийгээр Кремлийн хяналтад байдаг төрийн телевиз үл тоомсорлодог байсан ч сүүлийн жилүүдэд гарч ирсэн сөрөг хүчний цор ганц хүчтэй төлөөлөгч байлаа”  гэжээ.

Зохиогчид Навальныйг шоронгоос байнга бичиж өөрийн дэмжигч, хамтрагчдаа гуравдугаар сард болох ерөнхийлөгчийн сонгуулиар юу хийхийг зөвлөж, яг үд дунд санал хураах байранд цуглахыг санал болгож байсныг дурдсан байна. "Түүний эсэргүүцлийн дуу хоолой цуцашгүй байсан” гэж WP хэвлэл бичжээ.

Данийн Politiker хэвлэл тэргүүн  нүүрэндээ Найвальныйн тухай олон улсын тоймч Майкл Ярлнерийн өгүүллийг нийтэлсэн байна. Зохиогч Навальный шоронд өөрийн үхлийн тухайд “50, бас 50. Үхэж ч мэднэ, үхэхгүй ч байж мэднэ” гэж хошигнож байсныг дурдаад “Энэ бол няцашгүй өөдрөг үзлийн тусгал. Энэ нь үүний өмнө түүнийг хөнөөхийг  оролдсон Ерөнхийлөгч Владимир Путин болон Оросын өнөөгийн дэглэмийг эцсийн байдлаар доромжилж байгаа мэт. Одоо ийм явдал боллоо. Хоёр дахь оролдлого дээр" гэж тоймч бичсэн байна.

Оросын хэвлэлүүд

Оросын ихэнх хэвлэл бямба гарагт гарсангүй. “Коммерсантъ” сонин тэргүүн нүүрэндээ Мюнхений аюулгүй байдлын бага хурлын  тухай өгүүлэлдээ ерөнхийлөгчийн гол магтаалч Андрей Колесников төрийн тэргүүн Челябинскийн заводод зочилсон тухай голлон бичсэн байна. Харин сөрөг хүчний блогч Алексей Навальныйн нас барсан талаар хамгийн сүүлд дурдаад өнгөрчээ.

Оросын телевизүүдийн оройн мэдээнд сөрөг хүчний блогчийн нас барсныг товчоор, зөвхөн Шүүхийн шийдвэр гүйцэтгэх газрын албан ёсны мэдээ төдийгөөр дамжууллаа. Ийм мэдээллүүдэд Навальныйн зургийг ч харуулсангүй, хэн байсан талаар ч дурдсангүй, зөвхөн “залилангийн” хэргээр ял эдэлж байсан гэжээ. НТВ телевиз бүр түүний овог нэрийг ч дурдсангүй, зөвхөн Навальный л гэсэн байна. Маргааш өглөөний телевизийн мэдээнүүд ч энэ талаар огт дурдсангүй өнгөрчээ.

Кремлийн дуу хоолой бологчид болохоор олон нийтийн Х, болон “Вконтакте” сүлжээнд Навальныйн үхэл нь оросын эрх баригчдад, ялангуяа ерөнхийлөгчийн сонгууль болох гэж байхад ямар ашиггүй явдал гэдгийг нотлохыг оролдож байна. Орост гадаад тагнуул хэмээн нэрийддэг “Агентство” хэвлэл  ч ингэж бичжээ.

Эрх баригчдын талын сэтгэгдэл бичигчид 2020 онд Навалныйг хордуулсны дараа, Борис Немцовыг хөнөөсний дараа ч  сонгуулийн өмнө ийм явдал болсон нь Путинд ашигггүй, түүнийг л сэжиглэх явдлыг  намжаах хэрэгтэй гэсэн утгаар бичиж байсны адил бичиж байна.

Ийм санааг эрх баригчдыг магтан дуулдаг RT телевизийн тэргүүн Маргарита Симоньян дэвшүүлж байна. Хатагтай сөрөг хүчний блогчийн үхэлд оросын эрх баригчдыг буруутгаж байна хэмээн өрнөдийн улсуудын тэргүүн, хэвлэлүүдийг зэмлэжээ. “Юун түрүү нөхцөл байдлыг тодорхойлох хэрэгтэй, түүний амийг хөнөөх нь ямар ч утгагүй, тэгээд бүр сонгуулийн өмнө шүү. Энэ бол сөрөг талынханд л ашигтай” гэж тэр  олон нийтийн Х сүлжээнд бичжээ.

НАТО-гийн ерөнхий нарийн бичгийн дарга Йенс Столтенбергийн Оросоос “Навальныйн үхлийн талаар хариу өгнө үү” гэсэн шаардлагын хариуд хатагтай Маргарита Симоньян “Орос хэнд ч ямар ч өргүй. Үүний оронд та бидний сансарт юу хийсэн талаар асууж хошигносон нь дээр. Үүгээр дуусгая" гэсэн байна.

Тина Канделаки болохоор Навальныйн үхэл нь Оросыг олон улсын тавцан дээр гутаасан хэрэг гээд “олон нийт оросын зүг анхаарал хандуулж байгаа яг энэ үеэр оросын сөрөг  хүнийхэн өөрийн ийм сул орон зайгаа нөхөх цаг. Өрнөдийн ертөнц оросын эсрэг  давалгаа эхлүүлж байгаа нь сөрөг хүчинд гэнэтийн бэлэг болж байна” гэж тохуурхжээ.

Эх сурвалж: Монголын мэдээ сонин

2024 оны хоёрдугаар сарын 19. Даваа. №015 (5933)