Сум, дүүргийн иргэдийн төлөөлөгчийн сонгох сонгуулийн санал хураалт өчигдөр орон даяар 07.00 цагт эхэлж, 22.00 цагт өндөрлөсөн билээ.  Энэ удаагийн сонгуулийн ирц түүхэнд байгаагүй муу үзүүлэлттэй байсан бөгөөд 79 хороонд ирц бүрдэлгүй энэ сарын 23-нд дахин нэмэлт санал хураалт явуулахаар болсон юм.

Хэдийгээр сонгуулийн ирц муу үр дүнтэй байсан ч, урьдчилсан дүнгээр зарим дүүргийн ИТХ-д суух эрхмийн нэрс эхнээсээ тодорч эхэллээ. Тэр дундаа олны анхаарлыг хамгийн их татаж байсан Ерөнхийлөгч Ц.Элбэгдоржийн хүү Э.Эрдэнэ,  УИХ-ын дарга М.Энхболдын охин Э.Хулан нар сонгуульд  илүүрхэж, ялалт байгуулах нь тодорхой болж эхэлсэн гэнэ. Тэднийг сонгуульд өрсөлдөж буй тухайд олон нийт сайн  муу, зөв буруу хэмээн талцаж байсан нь яах аргагүй сонирхолтой байсных. Юутай ч тэд шууд өндөр албан тушаалд очсонгүй ядаж л гудамжаар алхаж, гэр хорооллын амьдралыг нүдээр боловч харж улс төрөө эхлэв. Цэрэг байгаад генерал болдог шиг анхан шатнаас нь эхэлж байгааг хүмүүс таашааж байгаа.