Тулгар төрийн 2233 жил, Их Монгол Улсын 818 жил, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ой, Үндэсний их баяр наадмын хүчит бөхийн барилдаанд түрүүлж, үзүүрлэсэн болон шөвгөрсөн бөхчүүдэд чимэг олгох болон бай шагнал олгох ёслол Хүй долоон худагт боллоо.

Уяачдын наадамд зориулсан барилдааны үеэр шагналыг нь олгодог уламжлалтай. Энэхүү ёслолд Үндэсний их баяр наадмыг зохион байгуулах хорооны дарга, Монгол Улсын Шадар сайд С.Амарсайхан, Нийслэлийн Засаг дарга бөгөөд Улаанбаатар хотын захирагч, Үндэсний их баяр наадмыг зохион байгуулах хорооны дэд дарга Х.Нямбаатар тэргүүтэй албаныхан оролцлоо. Улсын аварга П.Бүрэнтөгс, О.Хангай, арслан Б.Орхонбаяр, харцага Г.Ганхуяг нар чимэг хүртэж, шөвгөрсөн болон түрүүлж, үзүүрлэсэн бөхчүүд наадмын бай шагналаа гардан авлаа.

Энэ үеэр Увс аймгийн Нутгийн зөвлөлөөс дархан аварга цол хүртсэн Н.Батсуурийн амжилтыг “Ланд Крузер 600” маркийн машин гардуулсан юм. Тэрбээр ярихдаа, “Би таван наснаасаа үндэсний бөхөөр барилдсан. Увс аймаг Үндэсний бөхийн дархан аваргатай боллоо. 2022 оны наадмын үеэр дархан аварга Х.Баянмөнх цаг нь болоогүй байна, цаг нь ирэхээр болдог юм гэж байв. Тэгэхээр өнөөдөр цаг нь болжээ. Ирж дэмжсэн “Увс нуур” бөхийн дэвжээний хамт олон болон нутгийн ард олон, бөхчүүддээ баярлалаа. Үүнээс цаашаа “Увс нуур” бөхийн дэвжээ олон сайхан амжилт үзүүлэх болтугай” хэмээв.

Тэгвэл улсын аварга П.Бүрэнтөгс, “Монголын ард түмэндээ баяр наадмын мэндчилгээ дэвшүүлье. “Увс нуур” дэвжээ маань энэ жил уламжлал ёсоор “Харзтай” дахь “Шүтээн” амралтын баазад бэлтгэл хийлээ. Улсын наадамд долоо дахь удаагаа шөвгөрсөн, сайхан байна” гэв.

Харин улсын арслан Б.Орхонбаяр, “Бэлтгэл сургуулилалт үнэхээр сайн байсан. Наадам сайхан боллоо, үзүүрлэсэндээ баяртай байна. Намайг дэмждэг, бөхөө дэмждэг монгол түмэндээ баярлалаа. Энэ жил манай Сэлэнгэ аймгийн Цагааннуур сумын түүхт 100 жилийн ой болж байгаа. Нутгийн зон олондоо 100 жилийн ойгоороо сайхан наадахыг хүсэн ерөөе” хэмээн ярилаа.

Мөн улсын заан цолд хүрсэн Д.Хүдэрбулга, “Төв аймгийн Өндөрширээт сумынхаа 100 жилийн ойн баяр наадмын босгон дээр заан цол хүртлээ. Том цол аваад нутгийнхаа ойд очиж байгаадаа баяртай байна. Үнэхээр сайхан барилдлаа. Бэлтгэл ч сайн байсан. Өнгөрсөн жил тавын даваанд Ц.Бямба-Отгонтой тунаж унасан. Харин энэ жил заан цолын давааг давлаа, сайхан байна. Мөн “Нэгдэл” клубийн хамт олондоо маш их баярлалаа. Намайг дэмждэг, урам хайрладаг бүх хүнд баярласнаа илэрхийлье” хэмээн баярын сэтгэгдлээ хуваалцав.