Хорвоо дээр орших найман тэрбум гаруй хүн арьс өнгө, үзэл бодол, хүсэл сонирхол, соёл уламжлалаас эхлээд сонсдог хөгжим, уншдаг ном, үздэг киногоороо харилцан адилгүй. Тэр дундаа нас чацуу хүмүүс ч өссөн орчин, хувь хүний хандлага, төрсөн улсаасаа шалтгаалан тэс өөр байх нь бий. Тиймээс бид Монголын болон дэлхийн нас чацуу алдартнуудын амьдралын хэв маяг, эерэг дадал, биеэ авч явах соёлоос хуваалцах “Чацуутнууд” буланг хүргэж буй. Энэ удаа Соёлын тэргүүний ажилтан жүжигчин Г.Нарансолонго,  Солонгосын жүжигчин Сун Хе Гё  нарыг онцоллоо.

Дахин давтагдашгүй үзэсгэлэн гоо

Энэ цагийн чадварлаг, царайлаг жүжигчдийн төлөөлөл бол Г.Нарансолонго билээ. Багадаа эмч болохыг мөрөөддөг байсан цайлган сэтгэлтэй дэврүүн охин өсөж том болоод жүжигчний мэргэжлийг сонгосон. Бүгдийг гэгээнээр хардаг сайхан насандаа Хүүхдийн ордны драмын дугуйланд суралцсан. Ингэж л урлагт эргэлт буцалтгүй орсон түүхтэй.

 Тэрээр 2001 онд жүжигчин мэргэжлээр СУИС-ийг төгссөн. Ингээд уран бүтээлийн гараагаа Х-Түц продакшнаас эхэлсэн. 2013 оны Х-Түц продакшнаас өрх тусгаарлан "Эмоци" продакшн байгуулсан байна. Анх дунд сургуульд байхдаа "Найзууд" хэмээх телевизийн нэвтрүүлэг хөтөлж байсан. Тэрбээр "Зүүд шиг хайр", "Харьд одсон бүсгүйн заяа", "Мөрөөдлийн хөлөг онгоц" “Миний хөрш чөтгөр" тэргүүтэй арав гаруй дэлгэцийн уран бүтээлд дүрээ мөнхөлсөн авьяаслаг нэгэн. Үүнээс гадна зургаан мюзклд ажилласан бөгөөд тайзны зургаан жүжгээр үзэгч олонтой уулзсан. Г.Нарансолонгын хувьд анх "Сэргээш 1"-ийн “Төрсөн өдөр” тоглолтод дүр бүтээсэн. Уран бүтээлийнхээ тухайд “Дүр бүхэн өөрийн гэсэн онцлогтой. Дахиж давтагддаггүй. Тухайлбал, “Мөрөөдлийн хөлөг онгоц” кинонд хоёр хүний дундуур орох гэсэн тийм дүрд тоглож байв. Энэ дүр бол өөрийнхөөрөө, амьдралд зорилготой, эрч хүчтэй, арвич хямгач, ажилсаг эмэгтэй. Миний хувьд энэ дүрд тоглоход их ойрхон байсан” гэсэн нь бий.

Өнгөрсөн жил гэхэд "Нэгэн зуны цэцэг" хэмээх цоо шинэ жүжгээ үзэгч олондоо хүргэсэн. Тус жүжгийн найруулагч, Урлагийн гавьяат зүтгэлтэн Ч.Найдандорж нь Г.Нарансолонгын багш. Багштайгаа хамтарч ажилласан бүтээлээрээ олонд үнэлэгдэж чадсан.  Уран бүтээлийн үнэнч зөвлөх, амьдралын хань нь О.Тэмүүжин. Тэд энэ жил хуримаа хийсэн. Тэрээр ханийнхаа тухай “Манай Тэмка маш их эрч хүчтэй, их санаачилгатай. Хамтлаг дотроо үнэхээр манлайлагч, лидер нь байж чаддаг” хэмээн хэлсэн байдаг. Тэд нартын амьдралын үргэлжлэл болсон гурван хүүхэдтэй.

Тэр хамгийн хөөрхөн бас шилдэг нь

Сун Хе Гё бол Өмнөд Солонгосын энтертайнмент салбарын нэг бахархал билээ. Тэрээр 15 настайдаа уран бүтээлийн гараагаа эхэлсэн бөгөөд бараг бүх драмын төслүүд нь алдартай, хит болсон. Түүний хийсэн олон үйлдэл, тэр дундаа хамгийн үзэсгэлэнтэй жүжигчдийн нэг гэдгээрээ олон анхаарлын төвд байдаг. Мөн 39 насандаа Италийн тансаг загварын "Fendi" брэндийн элч төлөөлөгчөөр сонгогдсон удаатай. Түүнээс хойш Сун Хе Гё "Fendi"-ийн загварын арга хэмжээнд байнга оролцдог болсон бөгөөд сүүлд 2023 оны хоёрдугаар сарын 22-нд "Миланы загварын долоо хоног"-т оролцсон.

Мөн 2022 оны долоодугаар сарын 7-нд Fendi's Fall/Winter (F/W) 2022 Couture Collection шоунд оролцсон. Тансаг брэндийн элч төлөөлөгч болсноос хойш түүний гоёмсог дүр төрх улам дэгжин болсон гэж үзэгчид дүгнэдэг. "Форбес" сэтгүүл Сун Хе Гёг Солонгосын хүчирхэг алдартнуудын жагсаалтад багтаан зарласан. Тэрээр жүжигчин Ли До Хёнтой хамт хүчирхийллийн золиос болон амьдрал нь сүйрсэн ч өшөө авахын тулд амьдралаа дахин босгосон Мүн Дун Юн хэмээх эмэгтэйн дүрийг төгс харуулдаг.

Хурц ширүүн үйл явдал, зөрчилдөөн, гол дүрийн жүжигчид болон туслах жүжигчдийн чанар зэрэг нь “The Glory” киног асар их амжилтанд хүргэж, олон нийтийн мэдээллийн хэрэгслийн төрөл бүрийн платформуудаар цацагдаж, дэлхий даяар Netflix стриминг платформ дээр трэнд болсон. Сун Хе Гёгийн жүжиглэлтийг драмын олон шүтэн бишрэгчид болон мэргэжилтнүүд магтсан нь үнэхээр гайхалтай байлаа.

Тухайлбал, "Нарны үр сад" алдарт драмын хамтрагч, жүжигчин Сун Жүн Ги-тэй тус уран бүтээлээсээ хайрын романс үүсгэж, улмаар албан ёсоор хамтын амьдралаа зохион фэнүүддээ гэнэтийн бэлэг барьсан. Энэ нь ч үзэгчдийн хүслийг амьдралд биелүүлсэн гайхалтай үйл явдал байв. Гэсэн ч өдгөө тэд тус тусын замыг хөөсөн. Хэчнээн хүчтэй шуурга шуурсан ч унагаж чадахгүй, сул дорой биш гэдгээ батлан харуулсан Сун Хэ Гё боломжгүй зүйл гэж байдаггүйг үлгэрлэдэг. Түүний нөхрөөсөө салснаас хойших амжилтууд нь түүний мэргэжлийн ур чадвар, хичээл зүтгэл, шаргуу хөдөлмөрийг илтгэдэг. Тэр бол хамгийн шилдэг нь.

Эх сурвалж: “Зууны мэдээ” сонин

2024 ОНЫ ЕСДҮГЭЭР САРЫН 13. БААСАН ГАРАГ. № 178 (7422)