Одоогийн Засгийн газар ажлаа эхэлж байхдаа цөөнгүй хэдэн зоригтой шийдвэр гаргасан. Түүний нэг нь хадгаламжийн хүүнээс татвар авах. Энэ асуудлыг  одоогийн Засгийн газар ярьчихсан ч юм биш. Хэдэн жилийн өмнөөс л яриад байгаа, яриад л байгаа. Харамсалтай нь өнөөдрийг хүртэл хэрэгжсэн юм алга. Уг нь одоогийн Засгийн газар асуудлыг нэлээд дорвитой ярьж, элдэв хэл амнаас айхгүйгээр олон сая төгрөгийн хадгаламжтай хүмүүсээс хадгаламжийн хүүнээс нь татвар авахаар шинжтэй байсан. Гэвч сошиал ертөнцийн хэрэглэгчид жаахан жиг жуг хийсний дараа больчихлоо. Ард түмэндээ таалагдах гэж тэр байх. Тэгээд ч орон нутгийн сонгууль гэж нэг чөдөр тушаа байсан. 

 

Харин одоо орон нутгийн сонгууль ч дуусчихлаа, улс орны эдийн засаг ч өөдөлсөн юм алга. Тийм болохоор 100 саяас дээш төгрөгийн хадгаламжтай хүмүүсээс татвар авах асуудлаа эргээд сөхвөл яасан юм. Ер нь бол зөв зүйлийг хийхэд амлалтаасаа ухрахад яах вэ дээ, тийм биз дээ. Саяхан эрхтэн дархтан, эвэртэн тууртан, УИХ-ын гишүүд болоод өндөр албан тушаалтнуудын хөрөнгө орлогын мэдүүлэг гарлаа. Гэтэл УИХ-ын гишүүдийн дотор тэрбум давсан төгрөгийн хадгаламжтай нөхдүүд хэд хэд байна, хөөе. Тэгэхдээ ганц нэгхэн тэрбум биш бүр 10, 20, 30-аар нь л хадгалчихсан байна. 

 

Тухайлбал, УИХ-ын гишүүн Б.Наранхүү 21 тэрбум төгрөг банкинд аваачаад хийчихэж. Мөн Л.Болд гишүүн 17 тэрбум төгрөгийн хадгаламжтайгаараа араас нь нэхэж байгаа бол “Оргил”-ын гэх тодотголтой Ж.Ганбаатар гишүүн 13 тэрбумын хадгаламжтай байх жишээтэй.  Мөн “Монполимент”-ын Ц.Гарамжав 12 тэрбум төгрөгийн хадгаламжтайгаараа тэдэнтэй зиндаархаж байгаа юм.   Түүнчлэн, УИХ-ын гишүүн  С.Батболд 1.224, Ж.Энхбаяр 2.032, Х.Баделхан 1.004,  тэрбум төгрөгийн хадгаламжтай байна. Тэрбум төгрөг давсан хадгаламжтай гишүүдийг тоолоход л ийм байна. 

 

За тэгээд 200-900 сая хүртэлх төгрөгийг банкинд хадгалуулж байгаа “ядуувтар” гишүүд байна. Тухайлбал, УИХ-ын гишүүн Ж.Бат-Эрдэнэ 206, Б.Батзориг 850, Б.Дэлгэрсайхан 376, Г.Занданшатар 172, Ц.Мөнх-Оргил 299, З.Мурат 529, Л.Оюун-Эрдэнэ 130, Н.Оюундарь 216, М.Оюунчимэг 710, Н.Цэрэнбат 124, Д.Оюунхорол 113, Ч.Хүрэлбаатар 281, Н.Энхболд 205, М.Энхболд 336, Г.Тэмүүлэн 121, А.Ундраа 254, Н.Учрал 875 сая төгрөгийн хадгаламжтай байгаа юм. Хөрөнгө орлогын мэдүүлгээс нь харахад шүү дээ.  За тэгээд, аймгийн Засаг дарга нар, бусад албан тушаалтнуудын хадгаламжийг тоочвол 100 сая давсан хадгаламжтай хүн маш олон байна. 

 

Одоо тэгвэл жаахан тоо бодоцгоох уу. 21 тэрбум төгрөгийн хадгаламжтай хүн банкинд мөнгөө сарын ердөө л нэг хувийн хүүтэй хадгалууллаа гэж бодъё. Тэгвэл сардаа  210 сая төгрөг. За бүр багаар тооцъё. Сардаа 0.5 хувийн хүү авна гэж бодоход л Б.Наранхүү гишүүн хадгаламжийн хүүнээс сардаа 105 сая төгрөг цохиод л хэвтэж байна гэсэн үг.  Өнөөдөр бүтэн сар нойр хоолгүй зүтгээд 500-600  мянган төгрөг аваад, түүнээсээ улсад татвар өгч байгаа иргэдийн хувьд 105 сая гэдэг сонсоод л толгой эргэж, цус харвамаар их мөнгө биз дээ. Гэтэл энэ их мөнгөнөөс улс яагаад 10 хувийн татвар авчихаж болохгүй гэж. 105 саяас 15 хувийг нь татварт өгөхөд Б.Наранхүү гишүүн ядуураад, туйлдаад алахгүй л байх. 

 

За дээр нэр нь дурьдагдсан гишүүдээс хамгийн бага хадгаламжтай болох Г.Тэмүүлэн гишүүний авах ашгийг бодоод үзье. Мөн 121 сая төгрөгөө хугацаагүйгээр, хамгийн бага буюу сарын 0.5 хувийн хүүтэй хадгалуулсан гэж тооцъё. Тэгэхэд л сардаа 600 мянган төгрөг олчихно. Энгийн хүмүүсийн үхтэл ажиллаад сард авах цалинг зүгээр л банкны хүүнээс авч байгаа биз дээ. Тэгвэл түүнийхээ 60 мянгыг нь улсад төлчихөд ядуурчихгүй л байх.  

 

Өнөөдөр нөхцөл байдал ийм л байна шүү дээ. Гэтэл хадгаламжийн хүүнээс татвар авах гэхээр гишүүд нь өөрсдөө эсэргүүцдэг, янз бүрийн худлаа худлаа юм ярина. Бүр арай гэж хэдэн төгрөгөө хадгалуулж байгаа хүмүүсээс мөнгийг нь дээрэмдэх гэлээ гэсэн утга бүхий пиар хийж, сошиалаар нэг л дуулиан дэгдээнэ. Яг яс юман дээрээ эдний өөрсдийнх нь хийж байгаа л ажил. Ингээд л иргэд дургүйцлээ гэсэн нэрийн дор татвар авахаа больчихдог. Сүүлийн хэдэн жил иймэрхүү тактикаар л ажиллаж байна. Тэгээд хөрөнгө орлогын мэдүүлэг гарахаар л хадгаламжаараа "байлдаад” л. Иймэрхүү түшээдтэй л байна даа, бид.