Сүүлийн үед “Эрдэнэт” үйлд­вэрийн 49 хувийг Монголын талд худалдан авсан хийгээд нүүрсний үнэ, Тавантолгойн төмөр замын бүтээн байгуулалтын та­лаар­хи асууд­лууд олны анхаарлын төвд байх болсон. Тэгвэл эдгээр асуу­дал­­тай холбогдуулан Монголын Кон­сер­ва­тив намын дарга Н.Даш­даваа өчигдөр “Монгол ньюс”  мэдээллийн төвд хэв­лэ­лийн хурал зарлаж, байр сууриа илэр­хийл­лээ.

 

Тэрбээр хэвлэлийн хурлын эхэнд Тавантолгойн гэрээний улмаас Монголын тал ихээхэн хэмжээний хохи­рол амсч буйг онцолсон юм.  Энэ талаар “2010 онд Чалко компанитай нэг тонн нүүр­сийг 70 ам.доллароор нийлүүлэх гэрээ бай­гуу­лахдаа 350 сая ам.долларыг урьд­чил­гаа болгон зээл, сонгуулийн өм­нө ард түмэнд тараасан.

 

Үүний дараа дэл­хийн зах зээл дэх нүүрсний үнэ унасан нэрийд­лээр “Чалко”-гийн шахалтаар 23 ам.доллар болгож огцом бууруулсан. Одоо дэлхийн зах зээл дээр нүүрсний үнэ 250 ам.долларт хүрчихлээ. Цаашдаа ч өсөх хандлагатай байгаа.  Харин бид 27 ам.доллароор нийлүүлсээр байна. Энэ үнийг өсгөхгүй энэ чигээр нь нийлүүлэлт хий­сээр байгаа нь хэн гэдэг улстөрчдөд ашиг­тай вэ. 

 

Одоо Чалкогоос үлдсэн 100 сая гаруй ам.долларыг 27 ам.доллараар бодож төлөхөд олон жил шаардлагатай болно.  Үндэсний эрх ашиг эдийн засгийн хямралд санаа зовж байгаа улстөрчид байгаа бол одоо энэ гэрээнийхээ үнийг өсгөх тал дээр ажиллах хэрэгтэй.  Онгөрсөн найман  сарын хугацаанд л гэхэд энэ үнийн зөрүүнээс 2.1 тэрбум доллар олох боломжоо Монгол Улс алдлаа. Үүнийг эрх баригчид МУ-ын Засгийн газар яагаад нуугаад байгаа юм.

 

Зөвхөн энэ алдагдал гэхэд “Эрдэнэт”-ийн 49 хувийг таван  удаа худалдаж авах хэмжээний мөнгө” гэв.  Харин маргаан мэтгэлцээний гол сэдэв болоод буй “Эрдэнэт”-ийн 49 хувийг худалдан авсан тухайд “Эрдэнэт Монголынх болсонд баяртай байна. Эрдэнэтэд хувийн хэвшлийн компани менежмент хийснээр эрх баригч намууд ээлжилж шахаа хийдэг хэрэгсэл биш болж байгаад баярлаж байгаа. Эрдэнэт үйлдвэрээс монгол хүнд хожил ирнэ. “Эрдэнэт”-д ард түмэн шахаа хийдэггүй. улстөрчид л шахаа хийдэг.

 

Улстөрчид хувийн эрх ашгийн үүднээс хандаж байна. Эрдэнэтийг худалдан авсаныг шалгах хэрэгтэй. Улмаар түүнийгээ ард түмэнд нээлттэйгээр танилцуул. Ард түмнийг талцуулж, ард түмнийг сэтгэлгээний хямралд оруулмааргүй байна улстөрчид өө. Оросын ард түмний өмчид байсан 49 хувийг Монголд ирэхээр популизм хийж улстөрждөг тамын гурвалжингаасаа салах хэрэгтэй.

 

МАН эрх барьж чадахгүй байна. АН, сөрөг хүчний үүргээ гүйцэтгэж чадахгүй байна. Эдгээр нөхдүүдийн “Эрдэнэт” болон төрийн өмчит компаниудад шахаа хийдэг улстөрчдийн тодорхой баримтуудыг гаргаж тавина. Монголчууд бид улстөрчдийн бүлэглэлийн тархи угаалтын тоглоомонд орж болохгүй” гэдгийг онцоллоо. Мөн Н.Дашдаваа “Тавантолгойн гэрээний нөхцөл, Эрдэнэтийн 49 хувь Монголынх болсон асуудал, Тавантолгойн төмөр замын 49 хувийг зарах асуудлуудаар Үндэсний аюулгүй байдлын зөвлөл яаралтай хуралдаж, Үндэсний эрх ашигт нийцсэн шийдвэр гаргахыг уриаллаа.