Английн премьер лигийн 11 дүгээр тойргийн хоёр тоглолт өнгөрсөн шөнө боллоо. Энэ тойрогт Лондон хотын “Челси” клуб хүчтэй өрсөлдөгч “Саутгэмптон”-ы талбайд зочилж, 0:2-оор буулгаж авлаа. Ингэснээр 22 оноотой болж, тэргүүлэгч гурван багийн араас ердөө ганцхан онооны дутуутай дөрөвдүгээр байрт бичигдэж байна.

Тоглолтын 6 дахь минутад Азар гоолдож, тооны харьцааг нээсэн. Улмаар 55 дахь минутад Азарын дамжуулалтаар Диего Коста гоолдож, багтаа гурван оноо авчирчээ. Мөн тэрбээр 11 тойрогт 8 гоол оруулж, мэргэн буучийн жагсаалтыг ганцаар тэргүүлж байна.

Өчигдөр мөн “Эвертон” талбайдаа “Вест Хэм”-ийг хожиж, 18 оноотой болсноор 6 дугаар байрт бичигдэж байна. Энэ тоглолтод Лукаку нэг гоол оруулж, премьер лигт 7 гоолтой боллоо.