Түгжрэлийг бууруулах төсөл арга хэмжээний хүрээнд өнгөрсөн оноос Хан-Уул дүүргийн 22 дугаар хороо зайсангийн төмөрбетон 225 метр урт гүүрийн өргөтгөл шинэчлэлийн ажлыг гүйцэтгэсэн. Зайсан чиглэлийн /баруун тал/ төмөр бетон гүүрийн барилга угсралтын ажил 100 хувийн гүйцэтгэлтэйгээр дуусч, 2023 оны есдүгээр сард зорчих хэсгийн хөдөлгөөнийг нээсэн.

Тэгвэл Зайсангийн зүүн гүүр буюу хуучин гүүрний хөдөлгөөнийг энэ оны нэгдүгээр сарын 15-наас хааж, буулгах ажлыг эхлүүлсэн.

Гүүрний өргөтгөл, шинэчлэлтийн ажил дуусч өнөөдөр өглөө хөдөлгөөнийг нээсэн байна. Нийт дөрвөн эгнээ бүхий 225 метр урт, төмөрбетон гүүр барьсан. Уг ажлын хүрээнд шал суурийн арматур, дам нуруу бэлтгэх, газрын түвшнээс доош 17 метр гүнд шон суурилуулсан юм.