Аваргуудын лигийн хэсгийн дөрөвдүгээр тойргийн хүрээнд Испанийн “Барселона” клуб Английн “Манчестер Сити”-тэй тулж, 3:1-ээр хожигдсон билээ. Энэ тоглолтод “Барселона”-гийн гол хөдөлгөгч хүч болсон Месси нэг гоол оруулсан. Энэ гоолоороо тэр цөөнгүй хэдэн рекорд амжилтыг тогтоолоо.

Юуны өмнө тэрбээр Аваргуудын лигт 90 дэх гоолоо оруулж байгаа юм. Ингэснээр 90 гоолын босго алхсан хоёр дахь тоглогч боллоо. Мөн Аваргуудын лигийн хэсгийн шатанд 54 гоол оруулж, алдарт Раулын амжилтыг эвдлээ. “Реал”-ын домогт довтлогч Раул Аваргуудын лигийн хэсгийн шатанд 53 гоол оруулж байсан билээ.

Тэрбээр өнгөрсөн шөнө нэгийг оруулснаар Аваргуудын лигт энэ улиралд 7 гоолтой болж, мэргэн буучийн жагсаалтыг ганцаараа тэргүүлж байна. Месси өнгөрсөн улиралд Аваргуудын лигт 6 гоол оруулж байсан юм.

Мөн тэрбээр Английн багуудын эсрэг Аваргуудын лигт  хамгийн олон гоол оруулсан тоглогч болоод байгаа юм. Нийт 25 удаа Английн багийн эсрэг тоглохдоо 16 гоол оруулжээ.  Тэгэхдээ “Арсенал”-ын хаалганд хамгийн их буюу 6 тоглолтод 9 гоол оруулсан аж.

Харин “Манчестер Сити”-гийн эсрэг 5 тоглохдоо 5 гоол оруулчихаад байна. Тэгвэл “Манчестер Юнайтед”-ын эсрэг хоёр удаа гоолдохдоо хоёуланг нь Аваргуудын лигийн финалд оруулжээ. 2009 болон 2011 онд Ром болон Лондонд болсон финалын тоглолтод гоол оруулж байсан түүхтэй юм байна.