Сонгомол, чөлөөт бөхийн насанд хүрэгчдийн улсын аварга шалгаруулах тэмцээн Спортын төв ордонд маргааш эхэлнэ. 

Улаанбаатар хотод дөрвөн өдөр үргэлжлэх тус тэмцээнийг 1980 оны Москвагийн зуны XXII олимпын их наадмын мөнгөн медальт, Монгол Улсын гавьяат тамирчин, нэрт бөх Ж.Даваажавын нэрэмжит болгон зохион байгуулна. Ингэснээрээ Ж.Даваажавын Монголын бөхийн хөгжилд оруулсан үнэтэй хувь нэмэр, спортын түүхэнд үлдээсэн гавьяа зүтгэлийг хойч үедээ мөнхжүүлж байгаа ажээ. Түүний хувьд 1980 оны Москвагийн олимпоос мөнгөн медаль хүртсэнээс гадна 1975 оны залуучуудын ДАШТ-д түрүүлж, 1978 оны Азийн наадмаас хүрэл медаль зүүхийн зэрэгцээ насанд хүрэгчдийн УАШТ-д тав түрүүлсэн хүчтэн юм. Мөн 1979, 1980, 1981 оны “Интернациональ” тэмцээнд аваргалсан билээ. Үүнээс гадна 1982 оны улсын баяр наадамд тав тавж улсын начин цол хүртсэн бол 1986, 1990 онд цолоо хоёр удаа баталсан байна.

Хуваарийн дагуу нэгдүгээр сарын 8-нд сонгомол, 9-11-нд чөлөөт бөхийн улсын аварга шалгаруулах тэмцээн болж, Монгол Улсын аваргууд тодорно. Тэмцээнийг эрэгтэй, эмэгтэй тус бүр 10, сонгомол бөхийн 60, 67, 77, 87, 97, +130 кг-ын жингийн ангиллаар явуулах аж.