Дэлхийн хүн ам хоёр тэрбум ширхэг гар утас хэрэглэж байгаа гэх судалгаа бий. Тэдний нэг нь уншигч та. Түүнчлэн 2017 онд дэлхийн нийт хүн амын 30 гаруй хувь нь ухаалаг утас хэрэглэнэ гэх судалгааг Google компанийн шинжээчид гаргасан байх нь бий. Одоогоос есөн жилийн өм­нө Стив Жобс “Кит Кат” шоко­лад­наас томгүй хавтгай метал­лыг “Энэ миний гартаа барьж буй зүйл манай дэлхийг тэр аяар нь өөрчлөх эд” гэж “Apple” брэндийнхээ гар утсыг танил­цуу­лах­даа хэлж байсан удаатай.

Түү­ний үг эдүгээ биеллээ олсон гэдэг­­тэй хэн ч маргахгүй биз. Учир нь гар утас хаана ч авч явах боло­хоор авсаархан учир тар­ха­цын хувьд хамгийн түгээмэл бө­гөөд хамгийн өндөр хувиар за­рагд­даг төхөөрөмж гэдэгтэй санал нийлэх биз ээ. Бүр ухаалаг утас хэрэглэгчдийн 80 хувь нь 15 минут тутам утсаа шалгаж байдаг гэнэ билээ.

Өөрөөр хэлбэл, ухаалаг утас нь хүмүүсийн амьдралыг баяжуулж, нийгмийг өөрчилж, утасны зах зээлийг дахин шинээр төрөх хэмжээнд хүргэж байгаа нь нууц биш. Саяхан л Nokia маркийн гар утас барьж байсан монголчууд эдүгээ дэлхийтэй хөл нийлүүлж, Ipone7 авч барьцгааж байна. Тиймээс ч гар утас хэрэглэгчдийн тоо 2020 он гэхэд 50 тэрбумд хүрнэ гэдэг нь үнэний ортой биз. Ямартай ч гар утасгүй бол өнөө цагт хүний тооноос хасагдахад хүрсэн гэдгийг л энд өгүүлэх гэсэн хэрэг. Гэтэл өнөөх гар утас нь төхөөрөмж юм болохоор технологийн алдаа гарч, мэдээж хэрэг эвдэрч л таарна.

Тэгэхдээ бүр дэлбэрч, хүний аминд хүрсэн тохиолдол ч гарсан удаатай. Тодруулбал, Өмнөд Солонгос улсын “Самсунг” компани наймдугаар сарын сарын 19-ний өдөр дэлхийн зах зээл дээр “GalaxyNOTE S7” гар утсыг шинээр гаргасан. Гэвч гадаадын хэд хэдэн хэрэглэгчид тухайн утасны батарейг цэнэглэж байх явцад дэлбэрсэн тухай мэдээллийг олон нийтийн цахим хуудсанд байршуулснаар асуудал дэгдэх нь тэр. Бүр удаа дараалан дэлбэрсэн тохиолдол ч гарсан.

Үүнээс улбаалан  “Самсунг” компани АНУ, БНСУ-ын зах зээлд борлуулж байсан 1.5 сая гаруй гар утсыг эргүүлэн татаж эхэлсэн. Бүр “GalaxyNOTE S7” гар утас худалдан авсан хэрэглэгчдийг гар утсаа ашиглахгүй байхыг анхааруулаад байна. Үүнийг ч улс орнууд ажил хэрэг болгож, онгоцоор зорчих гэж буй хэрэглэгчдийг “GalaxyNOTE S7” утастай нэвтрүүлэхийг хориглоод байна. Учир нь “GalaxyNOTE S7” гар утастай хэрэглэгч онгоцоор зорчиж явахад утаснаас нь утаа гарч,  шатсан тул ослын буулт хийж зорчигчдоо буулгах арга хэмжээ авч байсан удаатай.

Тиймээс гар утастай холбоотой эд зүйл болох батарей, цэнэглэгч банкийг ч гар тээшинд оруулахгүй гэж шалган нэвтрүүлэх дээр сайтар нэгжих болжээ. Тэгэхдээ энэ шалгалт учир дутагдалтай байгаа нь ажиглагдлаа. Саяхан Улаанбаатараас Бээжин орох онгоцонд суух гэж байхдаа ийнхүү шалгуулав. Эндээс явахдаа гар тээшиндээ цэнэглэгч банк авч ороход зүгээр байсан ч Бээжингийн онгоцны буудал дээр хураалгасан тохиолдол гарав.

Урд хөршийнхөн гар утастай холбоотой зүйл дээр айхтар шалгалт хийж, бүр сельфиний гарыг ч анхаарч эхэлжээ. Тээшинд хийх ёстой цэнэглэгч банк, залгуур мэтийг гар тээшинд авч явсан тохиолдолд хурааж байх юм. Үнэндээ эвдэрч, шатаад байгаа энэ утсаа л хориглохоос бус бусад утасны эд ангийг авч яваа үед нь хурааж, хэрэглэгчдийг хохироож яана. Тэгээд ч гар утас хэрэглэгчидтэй ингэж тэмцэх биш үйлдвэрлэгчидтэй нь хатуу тэмцэх хэрэгтэй. Гар утасны эд зүйлүүд тийм ч хямдхан биш шүү дээ.