Дэлхийн бөхийн нэгдсэн холбооноос чөлөөт бөхийн дэлхийн аварга шалгаруулах тэмцээнийг Казахстаны Астана хотод зохион байгуулж байна. Өнөөдөр эмэгтэйчүүдийн 50, 57, 65, 76 кг-ын жингийн медальтнууд тодорно. Манай дөрвөн бөхөөс нэг нь хүрэл медалийн төлөө барилдах эрхтэй болсон. Мөн хоёр тамирчин дагах барилдаан хийнэ.

• 65 кг-ын хагас шигшээд шалгарсан Т.Энхжин Молдавын бөх Ирина Рингачид ялагдаж, хүрэл медалийн төлөө барилдахаар боллоо. Түүний дараагийн өрсөлдөгч Японы Нана Икехата болон Энэтхэгийн Ражнита нарын ялсан нь юм. 

Мөн 57 кг-ын жинд ДАШТ-ий мөнгөн медальт Б.Хулан Польшийн бөх Магдалена Лизевскатай дагах барилдаан хийнэ. Түүний хувьд эхний барилдаанаа Бразилийн Жуллиа Пеналбертэй хийж, 7:3-аар ялснаар шөвгийн 16-д үлдсэн. Б.Хулан дэлхийн чансааг тэргүүлж буй БНХАУ-ын Хун Кэсинид шөвгийн наймд ялагдаж ийнхүү ч дагах барилдаан хийх болов. 2026 оны Азийн аварга шалгаруулах тэмцээн болон “Айчи-Нагоя” Азийн наадамд түрүүлсэн Хун Кэсинь харин финалд шалгарсан юм.

• 76 кг-ын жинд Энэтхэгийн Кажал финалд шалгарсан учир ДАШТ-ий мөнгөн медальт Э.Даваанасанд мөн дагах барилдаан гарлаа. Түүний өрсөлдөгч Литвийн Камиле Гаукайте юм. 

Өнөөдөр манай бөхчүүдээс 62 кг-ын жинд ДАШТ-ий хүрэл медальт Т.Алтжин, 68 кг-д ДАШТ-ий мөнгөн медальт Э.Дэлгэрмаа, 72 кг-ын жинд Азийн аварга З.Болортунгалаг нар эхний барилдаанаа хийнэ.

Чөлөөт бөхийн хоёр дахь өдрийн тэмцээн Улаанбаатарын цагаар 13:30-с эхэлнэ.

Энэ удаагийн “Астана-2026” чөлөөт бөхийн дэлхийн аварга шалгаруулах тэмцээнийг “Боловсрол” телевизээр албан ёсны эрхтэйгээр шууд дамжуулан хүргэж байна.