Гайхамшигтай дуулдаг хэдий ч, биеийн галбираасаа болоод од болж чаддаггүй махлаг бүсгүй мэс засалд орж, гуалиг хөөрхөн болж буй тухай өгүүлдэг “Бүдүүн мисс” гэх  кино дэлгэцнээ гарсан байдаг. Тэгвэл яг үүнтэй адил БНХАУ-ын Шанхай хотын хамгийн тарган эмэгтэй гоо сайхны мэс засалд орж,  мэс засал ч амжилттай болсон талаар “shanghaiist.com” сайт мэдээлжээ.

Зун Мин гэх бүсгүй 1.50 метр өндөртэй хэдий ч, биеийн жин нь 150 кг аж.  Харин биеийн жингийн индекс нь 69.4 бөгөөд эдүгээ энэ үзүүлэлтээрээ тэрбээр Шанхай хотдоо тэргүүлдэг байна.  Эмч мэргэжилтнүүдийн хэлж буйгаар хэвийн үзүүлэлт нь 18.5-25-ын хооронд байдаг аж. Мэс засал таван цаг гаруй үргэлжилсний эцэст амжилттай дуусчээ. Мэс заслын дараа бүсгүй жилдээ 80 кг, зургаан сарын хугацаанд 60 кг жин хаях гэнэ.

Сайхан бие галбиртай болохын тулд мэс заслын ширээн дээр хэвтсэн Зу бүсгүй энэ удаагийн шийдвэртээ тун ч сэтгэл хангалуун байгаа бөгөөд “Турсныхаа дараа гоё хувцас авч өмсч чадна. Хар даа. Энэ бөгжийг сувилагч надад өгсөн. Тэд намайг турсныхаа дараа сайхан залуутай болзож, хуримлана гэдэгт итгэж байгаа” хэмээн ярьжээ.