МАН-ынхан засгийн эрхийг 65-уулаа атгах болсноос хойш ёстой л нэг дураараа дургиж, дунд чөмгөөрөө жиргэж байна даа. “Мэргэжлийн” гэх тодотголтой Засгийн газраа жинхэнэ утгаар нь байгуулна хэмээн мөрийн хөтөлбөртөө тусгасан ч мэргэжлийн бус хүмүүсийг тавьсан нь эдүгээ шүүмжлэлийн бай болсоор удлаа.

Түүгээр ч барахгүй өнөөх мэргэжлийн хэмээн томилсон сайдуудаасаа дөрвийг нь огцруулж магадгүй гэх яриа саарал ордноор тэнүүчлээд багагүй хугацааг үдлээ. Наанаа  МАН-ын гишүүд “Тийм зүйл ёстой байхгүй” гэх тайлбарыг хийж байгаа ч цаагуураа аль хэдийнэ орны хүнийг нь томилсон гэх бор шувуу нисч байгаа юм. Үүнээс гадна Шадар сайд У.Хүрэлсүх хэдэн сайд нараа ёстой нэг толгойг нь эргэтэл загнаж, тоосыг нь гөвөх нь л холгүй байгаа.

Тухайлбал, Улсын онцгой комиссын хуралдааны үеэр ЭМ-ийн сайд А.Цогцэцэгийг нэлээд хатуухан шүүмжилж, “Өвөлжилт хүндэрсэн отрын таван аймагт хэрэгцээтэй эмнэлгийн машины асуудлыг шийдэж чадаагүй” хэмээн бухимдангуй загнаж байсныг олон нийт харсан биз ээ. Үүгээрээ ч А.Цогцэцэг сайдыг огцруулах нь гарцаагүй болчихсон гэдгээ илэрхийлээд амжсан. Мөн огцрох дөрвөн сайдын сунгаанд Сангийн сайд  Б.Чойжилсүрэн, БСШС-ын сайд Ж.Батсуурь, Зам тээврийн хөгжлийн сайд Д.Ганбат нарын нэр яригдаж байгаа.  

Тэгвэл яг одоо Төрийн ордонд хуралдаж байх ёстой МАН-ын УИХ дахь бүлгийнхэн намынхаа Удирдах зөвлөлийнхөнтэй Цагаан ордондоо цугларч,  хаалттай хаалганы цаана огцруулах сайд нартай холбоотой асуудлыг хэлэлцэж байгаа сурагтай. Эрх баригч хүчнийхэн хуралдаж буй танхимынхаа гадна  хүн ч зогсоохгүй байгаа бөгөөд тун ч нууцлаг хурлыг, чимээгүйхэн хийж буй нь олны анхаарлыг хэдийнэ татаад амжжээ.

Ямартай ч, МАН-ынхан Цагаан ордондоо хаалттай хаалганыхаа цаана ямархуу “хор найруулж” суугааг нь  бурхан л мэдэх биз ээ.