Индонез гаралтай бяцхан төгөлдөр хуурч Жоей Александр энэ жилийн Грэмми Авардст дахин нэр дэвшжээ. Хүү эдүгээ 13-хан настай бөгөөд шилдэг  жааз хөгжмийн соло уран бүтээл төрөлд хоёр дахь удаагаа нэр дэвшиж байна. Тэрбээр алдарт жааз хөгжимчин Жон Колтрейны “Giant Steps” цомогт багтсан “Countdown” хөгжмөөр Грэммид нэр дэвшсэн байна.

Уг хөгжим нь дэлхий дахинаа гайхагдан бишрэгдэж буй хүүгийн цомогт мөн багтсан байдаг ажээ. Насандаа баймгүй тайван байдал, мэдрэмжтэйгээр төгөлдөр хуураа дарах Александр хүүгээс ч дэлхийн хэвлэл мэдээлэл, олон нийт анхаарлаа сулруулж байсангүй.  Тэрбээр өнгөрсөн удаагийн хөгжмийн ертөнцийн хамгийн нэр хүндтэйд тооцогддог тус наадамд хоёр төрөлд нэр дэвшсэн хэдий ч,  “эгшигт хайрцаг”-ны эзэн болж чадаагүй юм. Ирэх оны хоёрдугаар сарын 12-ны өдөр АНУ-ын Калифорни мужийн Лос—Анжелес хотод зохион байгуулагдах билээ.

Грэмми авардст Александраас гадна алдарт саксафонч Жон Колтрэйны хүү Рави Колтрэйн, жааз гитарчин Жон Скофилд нарын эрхмүүд өрсөлдөх гэнэ. Индонезийн Бали аралаас гаралтай гоц авьяастан хүүгийн эцэг эх нь жааз хөгжмийн цомог цуглуулдаг байжээ. Тиймээс ч эцэг эхийнхээ нөлөөгөөр хүү бүр бага байхаасаа төгөлдөр хуур тоглож эхэлсэн гэдэг.