МАН-ын гишүүд хуралдаа ч ирэхээ болилоо
Үнэмлэхүй ялалт байгуулсан 65 маань сүүлийн үед ажлаа хийхээ болиод байна. Тодруулбал, сүүлийн гурван долоо хоног УИХ дахь МАН бүлэг хуралдаж чадаагүй. Өнгөрсөн долоо хоногийн хурал нь ордонд биш Тусгаар тогтнолын ордонд өргөтгөсөн байдлаар хурал хийсэн. Тухайн хурлаар гишүүд нэлээд ширүүн “хэрүүл” хийсэн юм гэсэн. Тэгвэл энэ долоо хоногт МАН-ын долдугаар Бага хурал давхцаж, мөн л хуралдаагүй.
Зөвхөн бүлгийн хурлаар зогсохгүй чуулганы болон байнгын хорооны ирц асуудалтай байна. Тухайлбал, өнгөрсөн баасан гарагт УИХ чуулган ирц хүрээгүй улмаас хуралдаж чадаагүй бол өчигдөр өглөө Эдийн засгийн байнгын хороо ирц хүрээгүйн улмаас хуралдаж чадалгүй тарсан.
Үдээс хойш нь УИХ-ын Хууль зүй, УИХ-ын Эдийн засгийн байнгын хорооны хамтарсан хуралдаан хийж, Хөгжлийн банкинд хийсэн “улс төржсөн” гэх тодотголтой болоод байгаа тайланг хэлэлцэх байсан. Тус хамтарсан хурал 14:00 цагт эхлэх байсан ч мөн ирц хүрээгүй улмаас хуралдаж чадалгүй хойшлуулсан. Өөрөөр хэлбэл, хоосон зааланд АН гишүүн З.Нарантуяа, Д.Эрдэнэбат, Б.Пүрэвдорж, МАХН О.Баасанхүү зэрэг гишүүд бүтэн хоёр цаг гаруй хүлээсний эцэст хурал хойшилсон.
Тэгвэл энэхүү хамтарсан хурал өнөөдөр мөн л 14:00 цагт товлогдсон байгаа. Хуралдаж чадах эсэх нь эргэлзээтэй хэвээр. Эрх баригчид ийнхүү үндсэн ажлаа хийж чадахгүй байгаа нь ямар ч байсан сайн зүйл зөгнөөгүй л байх. Тэгээд ч сайдууд нь зодолдсон, тусгаар тогтнолын ордондоо очиж тусдаа “хэрүүл” хийсэн гээд сайн гэхээсээ саарал мэдээлэл олонтаа цацагдах болжээ.
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
