Ойрын өдрүүдэд УИХ-ын гишүүд ажилдаа ирэхээ байчихаад байгаа билээ. АН-ын цөөхөн хэдэн гишүүн байтугай эрх баригч МАН-ын 65 гишүүн ирцээ бүрдүүлж, хуралдаа сууж чадахгүй байгаа нь өнөөдөр өглөөний байдлаас харагдсан.

10:00 цагт эхлэх ёстой УИХ-ын чуулганы хуралдаан 11:00 цаг өнгөртөл эхлэлгүй, УИХ-ын дэд дарга Ц.Нямдорж гишүүдийнхээ ирцийг бүрдүүлэхийг бүлгийн дэд дарга нарт үүрэг болгож, нэлээд бухимдсан.

Тэрбээр  гишүүдийг нэр дуудаж, ирц бүртгэсэн бөгөөд хамгийн их анхаарал татсан гишүүнээр Н.Цэрэнбатыг тодруулсан юм. Учир нь тэрбээр ирц бүртгэх болгондоо түүний нэрийг дуудсан бөгөөд сураггүй болсон гишүүнээр ч нэрлээд амжсан.

Тэгвэл сураг алдарсан гишүүн 16:10 цагт ажилдаа ирж, Ц.Нямдорж гишүүнээс банга хүртээд амжлаа. Түүнийг орж ирэхэд Ц.Нямдорж гишүүн “Чи хаагуур яваад байна. Лүндээ энд сууж байхад залуучууд та нар ингэхгүй шүү. Ажил төрөлтэй юм бол чөлөөгөө аваад яв. Чи бүр олон удаа хуралд суугаагүй шүү” хэмээн бухимдсан.

Ямартай ч,  сураггүй болсон Н.Цэрэнбат гишүүн хуралдаа нэг юм заларлаа.

Э.Мөнх