Цав цагаан өнгийн дэрвэгэр хормойтой даашинз өмсч, хайртай дотны бүхий л хүнийхээ өмнө үхэн үхтлээ нэг нэгэндээ үнэнч байх тангараг өргөн хуримлана гэдэг эмэгтэй хүн бүрийн хүсэл байдаг гэдэгтэй хэн ч маргахгүй биз. Тэгвэл манай өмнөд хөршид үүнээс эсрэг гэмээр нэгэн содон хуримын ёслол болжээ. БНХАУ-ын Сычуань мужид  залуу хосын хурим зохион байгуулагдаж, олон ч хүн хүрэлцэн иржээ. 

Хайрын тангарагаа өргөн бөгж солилцох ёслолын ажиллагаа ч эхэлж, хөгжим дуугахад харин шинэхэн бэрийн оронд нөхөр нь цав цагаан өнгийн урт даашинз өмсч, харин эхнэр нь хар өнгийн костьюм өмссөн байсан нь ирсэн зочдод тун чиг өвөрмөц харагдсан гэнэ. Энэ санааг эхнэр нь гаргажээ. Бүсгүй хуримын даашинз өмсөх түүнд ядаргаатай санагдаж буйг учирлаж  ийнхүү нөхөртөө даашинзаа өмсүүлэхээр болсон байна.

Нөхөр Ву Шуайгийн хэлж буйгаар хосууд 2011 онд танилцсан бөгөөд тухайн үед найз бүсгүй нь ердөө 40 кг жинтэй туранхай бүсгүй байж. Гэтэл эдүгээ жин нэмж, нэлээд махлаг болсон байна. Улмаар бүсгүй жингээсээ ичиж, хуримын даашинзтай муухай харагдана хэмээн санаа зовсон учир Ву эхнэртэйгээ хувцсаа сольж өмсөхийг зөвшөөрчээ.  Харин эхнэрийнхээ төлөө ийм хачирхалтай, зоримог сонголтыг хийсэн залуу эдүгээ сошиал сүлжээнд ёстой л “Од” болж байна.