Монгол Улс уг нь өвөл болдог цөөн орнуудын нэг гэж байгаа. Дэлхийн хамгийн хүйтэн нийслэлтэй улс ч гэдэг. Ер нь бол цас мөсний орон л доо. Манайд өвөлтэй холбоотой бүх л сайхан, муухай зүлс бий. Тухайлбал, утаанаас авахуулаад. Харин нэг л зүйл алга байгаа нь өвлийн спорт. Дэлхий дахинд өвлийн спорт дээд цэгтээ хүртэл хөгжөөд, олон янзын тэмцээн уралдаан зохион байгуулдаг болчихлоо. Бүр Олимпийн наадам хүртэл байгаа юм билээ шүү дээ, нөхөд минь. 

Гэтэл манайд бараг хамаагүй юм шиг л байна. Өнгөрсөн өвлийн Олимпийн наадамд цанын хоёр тамирчин оролцсон байх. Харин тэшүүрийн тамирчин Б.Сумъяа Залуучуудын өвлийн олимпийн наадамд түрүүлж байж энэ спортыг жаахан мэдрүүлсэн байх, хүмүүст. Гэхдээ одоо эргээд мартчихсан байна. Ер нь сүүлийн хэдэн жил арай л жаахан идэвхтэй ажиллаж, тамирчдаа бэлтгэж байгаа нь тэшүүрийнхэн. Гэвч Тэшүүрийн холбоо гэж лойчихсон газар, төр засаг нь гэж нүдэн балай, чих нь дүлий. Ингээд л тэшүүрчдийн хөдөлмөр талаар болж байна.

Уг нь тэшүүрчид дараагийн өвлийн олимпийн наадмын эрхийг авчих санаатай үзээд байгаа юм. Харамсалтай нь дэмжиж байгаа хүн алга. Тэшүүр, цана, чаргаа ялгадаг дарга ч байдаг юм уу, үгүй ч юм уу, бүү мэд. Биеийн тамир, спортын газрын даргаар нэг сайхан өндөр, цагтаа сагсан бөмбөг тоглож явсан Ц.Шаравжамц гэдэг залуу ажиллаж байгаа. Мань эр Спортын төв ордныг шинэчлэнэ гээд овоо хэдэн сая ам.долларын хөрөнгө оруулалт энэ тэр яриад байгаа.

Түүний ярьж байгаа бүтвэл Спортын төв ордон гээч чинь сүртэй газар болох юм биш үү. Спорт, энтертайнментийг цогцлоосон, тамирчдыг бэлтгэл сургуулилт хийх нөхцлөөр хангасан дэлхийн жишигт нийцсэн ордон босгоно гээд байгаа. Яахав, сайхан л хэрэг. Харин мань эр өвлийн спорт гэж байдгийг бас л мартчихлаа. Ер нь ч үе үеийн дарга, албан тушаалтнууд өвлийн спорт гэж байдгийг мэддэггүй, эсвэл мартчихаад байдаг муу талтай.

Тэр жишгээр Ц.Шаравжамц даргатан явж байгаа бололтой. Аргагүй л дээ хөөрхий, ширэн бөмбөг л хөөж явсан болохоос цана, тэшүүр гэж юугаа л мэдээ аж. Хоккей, уран гулгалт, шорт трейк сонирхдоггүй бол яаж өвлийн спортын талаар санах юм. Харин ч спортын төв ордныг сагсны ордон болгоно гээгүй нь их юм. Тийм болохоор нэг газрын даргатай ярих асуудал ч биш байх. Тэгсэн дор бол Монгол Улсын Засгийн газрын гишүүд, Ерөнхий сайдад өвлийн спорт гэдгийг маш сайн, нарийн тайлбарлаад, хэдэн цагийн сургалт хийж, жаахан ойлголт өгчихөөд, дараа нь гуйвал дээр болов уу.

Өвлийн спортынхон, тэр дундаа мөсөн дээгүүр гулгадаг нөхдүүд нэгдэж аваад, төр засгийнханд жаахан сургалт хийчихээч. Манайд өвөл болдог, тийм болохоор цана, тэшүүрээр гулгаж болно. Тэр нь спортын төвшинд хүрчихсэн гэдгийг хэлээд өгөх хэрэгтэй. Тэгэхгүй болохоор хотын замын цасыг арилгахгүй болохоор гулгаа үүсээд, машин явж болохгүй гулсаад байгааг л өвлийн спортын хавьд хамаатуулж ойлгоод байгаа шүү дээ хөөрхийс.

Мөн төв талбайд нэг хашаа маягийн юм бариад, ус асгаж хөлдөөгөөд, хүүхдүүд гулгуулж тоглуулж байгаагаар төсөөлдөг ч байж болно. Гэтэл спорт арай өөр. Ядаж л өвлийн спортын битүү ордонтой болчихвол тэшүүр, уран гулгалт, шорт трейк, хоккей гээд маш олон спорт хөгжиж болохоор байгааг ойлгохгүй байна. Түүнийг зааж өгөөч ээ хөөрхийст. Тэгээд сайтар ойлгочих юм бол нэг өдөр бодож сууж байгаад гэнэт шийдээд, өчнөөн жил ярьсан өвлийн спортоо ордноо барих газар ч болов шийдээд өгчих ч юм бил үү, хэн мэдлээ. Тэгвэл тэшүүрийнхэн минь холбооныхоо удирдлага гэсэн унхай нь урагдчихсан юмнуудыг харж, бухимдаж суухгүй амар л болно доо.