Хоёр он солигдох шинэ жилийн баярыг монголчууд бид цагаан сараасаа ч өргөн дэлгэр тэмдэглэдэг болоод удаж байна. Энэ жил ч гэсэн их сайхан, өргөн дэлгэр тэмдэглэлээ. Эдийн засаг хүндхэн байгаа, улс орон хямарсан, өр төлбөрөө төлөх гэж аргаа барж байгаа гээд буй ч баярлах цэнгэхдээ бол гар татахгүй л байгаа, манай дарга нар. Тийм ч баяр, ийм цэнгүүн гээд л хөвөрч, дарга нараа шагнаж, шилдэг гишүүн хүртэл тодруулж ч байх шиг. Яасан сайхан сэтгэл амар баярлаж чаддаг юм. Ёстой л сүх далайтал үхэр амар гэдэг шиг л байна. Гэхдээ олон дарга, гишүүн дотор санаа зовдог, иргэний төлөө сэтгэл зүрхтэй хүмүүс бас байгаа.

Тухайлбал, Орхон аймгийн Засаг дарга Д.Батлут  Засаг даргын нэрэмжит “Шинэ жилийн баяр”-ын хүлээн авалтыг хийлгүйгээр түүнээс хэмнэсэн мөнгөөрөө 10 гэр худалдан авч гэнэтийн гамшиг ослын үед орон гэргүй болсон өрх гэрт гэр бэлэглэсэн байгаа юм.  Нэг орой ууж идээд, согтоод өнгөрөх 20 сая төгрөгөөр ийм буянтай ажил хийж, 10 өрхөд аз жаргал бэлэглэж.  Өнөө “Орос шиг л бай л даа” гэдэг шиг манай дарга нар яагаад Д.Батлут дарга шиг байж болдоггүй юм бэ, энэ чинь. УИХ-ын гишүүдийн шинэ жилийг хийхгүй байж болно, тухайлбал.

Нэг аймгийн Засаг даргын нэрэмжит шинэ жилийг тэмдэглэхгүй байхад 20 сая төгрөгийн зардал хэмнэж болж байна. Тэгвэл УИХ-ын гишүүдийн шинэ жилийг тэмдэглэхгүй өнгөрөөхөд үүнээс 10 дахин их мөнгийг хэмнэж болох байх, хамгийн багаар тооцоход. Тэгвэл тэр хэмжээний мөнгөөр эмнэлэгт өвчиндөө шаналж байгаа үрсээ эдгээхэд зориулж хөрөнгө оруулалт хийсэн ч яах вэ дээ. Өнөөдөр манай улсад юу их байна, асуудал л дүүрчихсэн.

Шийдвэрлэх, шийдэх асуудлаас их юм алга. Монгол Улсын Засгийн газрын гишүүд, УИХ-ын түшээдэд шинэ жил тэмдэглээд, баярлаж суух зав байгаа бил үү. Юунд ч санаа зовохгүй ууж идэх эрх бий бил үү. Уг нь үгүй. Харин манай дарга нар улс орноо боддоггүй, амин хувийн жаргалаасаа хальж чадахгүй байгаа учраас ингээд л баярлаад сууж байна. Тэгээгүй бол ганц жил нийлж шинэ жилдэхгүй байхад яах вэ дээ.

Тэр дундаа эдийн засгийн хямралтай үед нэг их баярлаад байх эрх байхгүй. Нийслэлийн удирдлагууд ч гэсэн хөрөнгө мөнгө хүрэлцэхгүй гээд байгаа мөртлөө л баяр ёслол, найр наадамд гар татахгүй цацаж байна. Энэ жил “Улаанбаатарын мөнгөн үдэш” гэсэн цэнгүүн хийгээд, төв талбайд тайз засч, баахан дуучин дуулуулсан. Никитон, Камертон талбайд тоглоход тус бүртээ 50 саяыг авсан.

Тэрэнтэй адил хөхөө хөвлийн хүйтэнд дуулах гэж оролдсон хэдэн хамтлаг, дуучид. Хөтөлж байгаа нэртэй хашгичсан нөхөд тодорхой хэмжээнд мөнгө авсан л байж таараа. Дахиад хэдэн зуун саяыг үрэн таран хийснийг бүү мэд. Эдийн засгийн хямралтай, гадаад өр төлбөр төлөх гэж байгаа энэ үед ганц удаа шинэ жилийн цэнгүүн хийхгүй байлаа гээд дарга нарын нэр хүнд унаад баларна гэж бодохгүй байна.

Харин ч ард иргэд дэмжинэ, талархана, бахархана. Айл ч гэсэн орлого мөнгө муутай бол овлигогүйтээд л, зээл аваад шинэ жил хийгээд байдаггүй биз дээ. Боломж бололцоогоороо хэдэн жигнүүр бууз хийгээд, телевизээ үзээд, оргилуун дарсаа буудуулаад он гаргачихдаг. Монгол Улс ч гэсэн нэг байл.

Гэхдээ маш их өртэй, орлого багатай, үр хүүхдээ тэжээж чадахгүй дээрээ хүрчихсэн, хоосон хонох шахаж байгаа айл. Ийм айл байгаа хэдхэн төгрөгөөрөө баяр хийгээд дуусвал юу болох билээ. Түүний оронд арай өөр зүйлд зарцуулж байж амьдарна биз дээ. Нэг дарга ийм сайн сайхан санаачилга гаргаж болоод байна. Бусад нь яагаад болохгүй гэж. Ядахын мууд С.Жавхлан гишүүн шиг ч болов бай л даа, энэ чинь. Айлд цалингаараа толгой шийр, гэдэс авч өг гэж байгаа юм биш. Зүгээр л шинэ жилийн цэнгүүнд оролцохоосоо татгалзчих л хэрэгтэй юм.