АНУ-ын Ерөнхийлөгч Барак Обама бүрэн эрхийн хугацаа нь дуусгавар болохоор урьтаж, “Wikileaks” сайтад цэргийн нууц мэдээлэл задруулсан гэх үндэслэлээр 35 жилийн хорих ял сонссон трансжендер цэрэг Челси Мэннингэд өршөөл үзүүлж, ялыг хөнгөрүүлжээ. Ингэснээр Ч.Мэннинг ирэх тавдугаар сард суллагдахаар болсон байна. 

Бүрэн эрхийнх нь хугацаа энэ сарын 20-ны өдрөөр дуусгавар болох Барак Обама нийтдээ 64 хүмүүжигчид өршөөл үзүүлжээ. Мөн 209 хоригдлын ялыг хөнгөрүүлэх шийдвэр гаргасан байх бөгөөд үүнд 2013 оны наймдугаар сард тагнуулын хэргээр ял сонссон Челси Мэннинг багтаж буй гэнэ. Харин эл мэдээлэл цацагдсны дараа “Wikileaks” сайт албан ёсны твиттер хуудастаа “Ялалт” хэмээн жиргэсэн байв. Нөгөөтэйгүүр, 2013 онд АНУ-ын Засгийн газрын олон улсын хяналтын системийг нийтэд дэлгэснийхээ дараа Хонконгоор дамжин ОХУ-д орогнох болсон АНУ-ын Тагнуулын төв газрын ажилтан асан Эдвард Снөүдэн өршөөлд багтаагүй байна.