Үхдэл хийгээд хүн төрөлхтөний хоорондын ширүүн тэмцлийн тухай өгүүлэх “Resident Evil” киноны анхны цуврал 2003 онд дэлхийн кино театруудын дэлгэцнээ нээлтээ хийж байв.  Тэгвэл түүнээс хойш 14 жилийн дараа тус цувралын  сүүлчийн анги үзэгчдэд хүрсэн нь “Resident Evil-5” байсан юм. Кино энэ сарын 7-нд Америкийн кино театруудад нээлтээ хийсэн бөгөөд гол дүрд нь Милла Йовович тоглосон бол  найруулагчаар нь түүний нөхөр Пол Андерсон ажиллажээ. Мөн тэдний том охин нь ч тус кинонд дүр бүтээгээд амжсан байна.  Ингээд жүжигчин бүсгүйн  уран бүтээлийнхээ талаар дэлгэсэн сонирхолтой ярилцлагыг орчуулан хүргэж байна.

-“Resident Evil” киноны шинэ цуврал өмнөх шигээ тулаан, хурц үзэгдлүүдтэй санагдсан?

-Зураг авалт эхлэхээс өмнө бэлтгэлээ сайн хангасан шүү.  “Resident Evil final chapter” өмнөх ангиудаа бодвол хүний санаанд оромгүй хүнд, хэцүү тулаант үзэгдэл ихтэй. Гэхдээ би өөрөө адал явдалд дуртай учраас өдөр бүр л орлон тоглогчдын хамт бэлтгэл сургуулилт хийж байсан.

-Анхны цуврал гарснаас хойш 14 жилийн дараа сүүлчийн анги нь гарсан. Цуврал ингээд дуусч байна шүү дээ. Таны сэтгэгдэл ер нь ямар байна вэ?

-Ний нуугүй хэлэхэд гунигтай байна. Надтай хамтарч ажиллах хөгжилтэй байдаг гэж хэлдэг атлаа ингээд цувралаа дуусгачихаж байгаад нь нөхөртөө жаахан гомдох  шиг. /инээв/

-Алис гэх бүсгүйн дүрийг бүтээснээр таны амьдралд гарсан өөрчлөлт?

-Алисын дүрд тоглосноос хойш би үнэндээ маш олон зүйлийг  сурч авсан. Тухайлбал, жүжиглэнэ гэдэг  өөрийн болон дүрийнхээ өвөрмөц зан араншинг хамтад нь харуулахын нэр юм байна гэдгийг ойлгосон.  Гэхдээ тоглох гэж буй дүрийнхээ онцлог зан чанараас өөртэйгөө нийтлэг талыг нь олж харах хамгийн чухал юм билээ. Тэр утгаар Алисын дүрд тоглосноос хойш дүрийнхээ  зан чанарыг  гүнзгий таньж мэдэхийг илүүд үзэх болсон.

-Зураг авалт эхлэхийн өмнө шинэ хүнээ өлгийдөж авсан гэсэн. Үүнийг дагаад зураг авалтын хуваарьт ч өөрчлөлт орсон гэж сонссон юм байна?

-Төрсний дараа биеийн галбирт нэлээд өөрчлөлт орсон.  Ер нь хоёр охиноо төрүүлэх үед аль алин дээр нь  жин их нэмсэн. Гэхдээ энэ удаагийн  цувралын зураг авалт эхлэхээс өмнөхөн нярайлсан учраас маш богино хугацаанд турах шаардлагатай болсон.
Тэгээд төрмөгцөө л  эрчимтэй  тураах дасгал хийж, хоолны дэглэм барьж эхэлсэн. Хамгийн хэцүү нь зураг авалтын эхний гурван долоо хоног байлаа. Усан санд  өдөрт бараг 10 цагаар үхдэлүүдтэй тулалдах үзэгдлийг авч байсан юм. Эмэгтэй хүний хувьд адал явдалт  киноны гол дүрийг бүтээхээс өөр дэглэм барих том  шалтгаан бараг байхгүй байх.  

-Кинонд том охин тань тоглосон  байх аа. Энэ санааг хэн гаргасан бэ?

-Нөхөр маань гаргасан юм. Зураг эхлэхийн яг өмнөхөн л охиноо тоглуулах шийдвэр гаргасан. “Улаан хатан” өөрөө компьютерын систем учраас харагдах байдал нь арай өөр жүжигчин хэрэгтэй болсон. Бас британи англи хэл, америк англи хэлийг хооронд нь  ялгах чадвартай байх шаардлагатай учраас ийм чадвартай хүүхдийг хайсан юм.

Азаар Эвер  миний авьяасыг өвлөсөн. Түүнийг нь ч аав нь мэддэг учраас энэ дүрд тоглуулахаар сонгосон байх. Охинд маань ч кинонд тоглох таалагдаж байсан шүү. Зураг авалт дууссаны дараа “Ээж ээ, би өөрийн хүсч байсан зүйлээ олчихлоо” гэж хэлж билээ.  Үнэхээр урлагт хөл тавих хүсэл эрмэлзлэлээ цаашид хаяхгүй бол охин минь гайхалтай жүжигчин болж чадна  гэдэгт би итгэлтэй байгаа.

-“Resident Evil”-ийн сүүлчийн цувралд гэр бүлээрээ хамтран ажилласан болохоор таны хувьд нэлээд онцгой кино болсон байх нь?

-Миний хувьд дуртай ажлаа хийхээс гадна хайртай хань, охинтойгоо хамтран ажилласан учраас гэр бүлийн минь хамтын бүтээл болж чадсан. Үүнээс өөр аз жаргал гэж хаана байх билээ. Зарим хүмүүс “Гэр бүлээрээ хамтран ажиллах хэцүү биш үү” гэж асууж байсан. Үнэндээ огт хэцүү байсангүй.