Ойрын өдрүүдэд цаг агаар харьцангуй тогтвортой байсан ч ирэх хэд хоногт огцом хүйтэрч, цаг агаар муудахыг Цаг уур, орчны шинжилгээний газраас олон нийтэд хандан мэдээлсэн. Бүр Сибирээс шилжин ирж буй хүйтэн агаарын нөлөөгөөр нэгдүгээр сарын 28-нд нутгийн зүүн хагаст цас орж, хүчтэй цасан шуурга шуурна. Нэгдүгээр сарын 28, 29-нд ихэнх нутгаар хүйтний эрч чангарна гэж тус газраас онцгойлон анхааруулсан. 

 

Төв, Хэнтий, Дундговь, Дорноговь, Дорнод, Сүхбаатарын нутгаар хүчтэй цасан шуурга шуурна. Мөн Өмнөговь, Дундговь, Дорноговийн нутгаар салхи секундэд 18-20 метр, зарим үед секундэд 24 метр хүрч ширүүснэ. 

 

Тиймээс жолооч нар шатах тослох материалын нөөцтэй, тээврийн хэрэгслийн техникийн бэлэн байдлыг хангаж замд гарах, мал аж ахуй эрхэлдэг иргэд, малчид малын өвс тэжээд, түлээ, нүүрсээ сайн базаах, малаа дагаж явж осгож хөлдөхөөс урьдчилан сэргийлэх, малаа аль болохоор ойр бэлчээх, дулаан хувцаслахыг санууллаа. Мөн иргэд онцын шаардлагагүй бол аян замд гарахгүй байх зэргээр осголт хөлдөлтөөс урьдчилан сэргийлэх арга хэмжээ авахыг харьяа байгууллагуудаас анхааруулж, түүнийг нь хэчнээн ч хоног хэвлэл мэдээллийнхэн дахин дахин сануулж, дамжуулсан.  

 

Гэтэл Онцгой байдлын ерөнхий газраас аюулт осол, нөхцөл байдлын талаар гаргасан мэдээлэлд “Цасанд суусан, сураггүй болсон” гэх дуудлага маш их ирсэн байх юм. 

 

Тодруулбал, Дархан-Уул аймгийн Хонгор сумын 2 дугаар багийн Нумтын даваа гэдэг газар иргэн Д-ийн эзэмшлийн 1 зорчигч бүхий суудлын автомашин цасанд суусан тухай дуудлага өнөөдөр үүрийн 04:20 цагт тус аймгийн Онцгой байдлын газарт иржээ. Онцгойгийнхон ажиллаж, автомашиныг цаснаас татан гаргасан байна.

 

Мөн Төв аймгийн Мөнгөнморьт сумын Майдлаг багийн Хөшийн-Ам гэдэг газар иргэн Г-ийн эзэмшлийн 2 зорчигч бүхий бага оврын ачааны автомашин цасанд суусан тухай дуудлага өчигдөр 15:38 цагт ирж, Багануур дүүргийн Онцгой байдлын хэлтсийн 5 албан хаагч, 1 автомашинтай ажиллаж автомашиныг цаснаас татан гаргажээ. Гэвч автомашин нь явах боломжгүй болсон тул газар дээр нь орхиж 2 иргэнийг аюулгүй газарт хүргэж өгчээ.

 

Түүнчлэн Хэнтий аймгийн Цэнхэрмандал сумын Хужиган багийн Могой мод гэдэг газар иргэн Н-н эзэмшлийн улсын дугаартай 4 зорчигч бүхий суудлын автомашин цасанд суусан тухай дуудлага өчигдөр 14:55 цагт ирж, нийслэлийн Налайх дүүргийн Онцгой байдлын хэлтсийн 8 албан хаагч, 1 автомашинтай ажиллаж 4 иргэнийг аюулгүй газарт хүргэж автомашиныг цаснаас татан гаргасан байна.

 

Энэ мэтчилэн сануулж, сэрэмжлүүлсээр байхад хол замд гарч, онцгой байдлынхны ажлыг нэмэгдүүлж, цаашлаад өөрсдийнхөө эрүүл мэнд, амь насанд аюул учруулж байх хэнд хэрэгтэй юм бэ. 

 

Ер нь ч тэгээд сошиал хуудсаар хэн нэгний гэр бүл салж, нийлэх асуудалд анхаарал хандуулж, шүүмжилж, мэтгэлцэж байхын оронд сэрэмжлүүлэг мэдээллийг анхаараад нэг уншчихсан бол улсын хөрөнгө мөнгө, бензин тосыг үрэх вэ дээ. 

 

Цаашдаа энэ мэт асуудлаа хаа хаанаа анхаараад, сэрэмжлүүлж, анхааруулсан бол зөрж зүтгэхээ больчихмоор юм. Хэдий болтол хээгүй, хэнэггүй гэдгээрээ түрий барих гэсэн улс вэ.