Саяхан л хоёр он солигдох шинэ жилийн баярыг монголчууд өргөн дэлгэр тэмдэглэж байсан бол одоо бууз банш, ууц ярьсан шигээ, шинэ дээлээр гангарах тухай хөөрлдөж сууна. Эдийн засаг хүнд байгаа, улс орон хямарсан, өр төлбөрөө төлөх гэж аргаа барж байгаа гэж байгаа ч монгол түмэн угаасаа баярлах цэнгэхдээ бол гар татахгүй л хүмүүс. Ялангуяа манай дарга нар тийм ч баяр, ийм цэнгүүн гээд л хурган дарга нараа шагнадаг нь гэм биш зан. Улс орон нь уруудан доройтож, иргэд нь өдөр ирэх тусам ядуурч, туйлдаж байхад яасан ч сайхан сэтгэл нь амар баярлаж чаддаг юм. Ёстой л сүх далайтал үхэр амар гэдэг шиг л байна. 

 

Гэхдээ олон дарга, гишүүн дотор санаа зовдог, иргэний төлөө сэтгэл зүрхтэй хүмүүс бас бий. Тухайлбал, Орхон аймгийн Засаг дарга Д.Батлут 2016 оны төгсгөлд Засаг даргын нэрэмжит “Шинэ жилийн баяр”-ын хүлээн авалтыг хийлгүйгээр түүнээс хэмнэсэн мөнгөөрөө 10 гэр худалдан авч гэнэтийн гамшиг ослын үед орон гэргүй болсон өрх гэрт гэр бэлэглэсэн. Нэг орой ууж идээд, согтоод өнгөрөх 20 сая төгрөгөөр ийм буянтай ажил хийж, 10 өрхөд аз жаргал бэлэглэсэн байгаа юм. 

 

Тэгвэл тэрбээр цагаан сар угтаад дахиад л нэгэн сайхан зүйлийг санаачлаад өөрөө түүчээлээд эхэлж. Тодруулбал, тэрбээр сар шинийн баяраа тэмдэглэх санхүүгийн боломж тааруу ахмад настан хөгжлийн бэрхшээлтэй иргэдийг баярлуулах уриалгыг гаргаж энэхүү сайн дурын хүмүүнлэгийн ажиллагаанд өөрийнхөө сарын цалинг хандивлаж байгаагаа мэдэгдэж, эрдэнэтчүүдээ түүчээлсэн байна. 

 

Сайхан сэтгэлийн үзүүрт шар тос гэдэг байх аа. Үнэндээ Засаг дарга гэж иргэдээ боддог, ард түмнийхээ төлөө ажиллаж чаддаг, сэтгэлтэй хүн байх хэрэгтэй юм шиг байгаа юм. Орхон аймгийн Засаг дарга Д.Батлут дээрх ажлуудыг хэрэгжүүлээд зогсохгүй цэрэг эрсээ эргэж, бас ар гэрийнхэнд нь туслаж, сумынхаа иргэдийн ахуй амьдралд нь санаа тавьж, байр савыг нь хүртэл засч, янзалж өгсөн байгаа юм. 

 

Түүгээр ч барахгүй одоо “Элэгний вирусгүй Эрдэнэтчүүд” аяныг санаачлаад явж байна. Үнэхээр нутаг орноо гэсэн сэтгэлтэй, хөдөлгөөнтэй хүн гэдэг нь одоо өрнүүлээд байгаа ажлаас нь л харагдаад байгаа юм. 

 

Тиймээс л манай дарга нар үлгэр жишээ аваасай, сэтгэл байвал ажиллаж болдог юм байна гэдгийг хэлээд байгаа хэрэг.