ОХУ-ын Ерөнхийлөгч В.Путиныг эсэргүүцэгч гэж тодот­гож болохуйц улстөрч 35 нас­тай Владимир Кара Мурза бус­дад хорлогдсоны улмаас эм­нэ­лэгт хүргэгджээ. Тэрбээр эдү­гээ үхэл, сэхлийн заагт буй бө­гөөд эрхтэн дутагдалд орсон ту­хай эхнэр нь сэтгүүлчдэд мэ­дээл­сэн байна. Мөн ямар нэгэн үл мэ­дэг­дэх бодист хордсон гэж онош­логд­жээ. Өмнө нь Кара Мурза хордож байсан ч,  тухайн үед амь наснаас нь холуур өн­гөрч бай­сан гэнэ.

В.Путиныг шүүмж­лэгч тэрбээр АНУ руу аяла­хын­хаа өмнөхөн ийнхүү хор­дож, түргэн тусламжийн тэр­гээр эмнэлэгт хүргэгдсэн байх юм. Владимир Кара Мурза ард­чиллыг дэмжигч “Нээлттэй Орос” нийгэмлэгт ажилладаг бай­жээ. Эмнэлэгт хүргэгддэг шөнөө  эхнэр, хоёр хүүхдийнхээ хамт хадмындаа байсан бөгөөд Вашингтон ДС хот руу нисэхээс ердөө хэдхэн цагийн өмнө гэнэт л биеийнх нь байдал муудаж эхэлсэн байна.

Ардчиллын төлөө идэвхитэй тэмцэгч, мөн сэтгүүлч  тэрбээр 2015 онд мөн л хордсон гэх шалтгаанаар эмнэлэгт хүргэгдэж, хоёр сарын хугацааг эмнэлгийн орон дээр өнгөрүүлж байжээ. Тухайн үед бөөрний архаг дутагдалд орсон байсны зэрэгцээ цуснаас нь хүнд металл өндөр агууламжтай илэрч байж.  Болсон процессын талаар түүний эхнэр  Евгения “The Independent” сонинд өгсөн ярилцлагадаа “Түүний биед хоёр жилийн өмнөхтэй төстэй шинж тэмдэг илэрсэн. Тэгээд бид түргэн тусламж дуудаж эмнэлэгт хүргэсэн.

Тэр өдөр бид хамтдаа Вашингтон руу нисэх гэж байлаа” гэж ярьжээ. Харин хамгийн сүүлд эхнэртээ хэлсэн үгийн талаар лавлахад бүсгүй “Биед нь ноцтой шинж тэмдэг илрэх үед тэр надтай ярилцаж байсан юм. Зүрхнийх нь цохилт хурдсаж, амьсгалахад төвөгтэй  хэвийн бус шинж тэмдэг илэрч буйг хэлсэн. Харин түүнийг эмнэлэгт хүргэсний дараа эмч нар ямар нэг үл мэдэгдэх бодист ноцтой хэмжээнд хордсон гэсэн шинжилгээний хариу гарсан талаар дуулгасан” хэмээн ярьсан байх юм.

Мөн  “Харамсалтай нь маш олон хүн миний нөхрийн хийж буй үйл ажиллагаанд дургүй. Тиймээс яг үнэндээ түүнийг хэн нэгэн хордуулсан байлаа ч, үнэн зөвийг нь тогтооход туйлын бэрх” гэжээ.  Хамгийн гол нь Кара Мурзагийн сүүлийн үед хийж хэрэгжүүлсэн ажил нь сонирхол татна. Тодруулбал, тэрбээр 2015 онд Кремлийн ойролцоо найз бүсгүйтэйгээ зугаалж явахдаа буудуулж амиа алдсан дотны найз, сөрөг хүчний либериал улстөрч Борис Немцовын талаархи баримтыг  Оросыг тойрон аялж цуг­луулж байжээ. Тэр бүү хэл, эм­нэ­лэгт хүргэгдэхийнхээ өмнөх өдөр фэйсбүүк хуудсаараа дам­жуу­лан Борис Немцовт хүн­дэт­гэл үзүүлж байсан тухай ойрын хүмүүс нь ярьж байна.

Үүнээс үзвэл Борис Немцовын хэ­рэг­тэй холбогдуулан түүнийг хор­дуул­сан байж магадгүй хэмээн хар­даж болохоор байгаа юм.  Гэх­дээ одоогоор  Владимир Кара Мурзаг хэн нэгэн санаатайгаар хор­дуул­сан эсэхийг нотлох баримт байхгүй. Эхнэр болон гэр бүлийнхэн нь ч дотоодын шин­жил­гээ, хууль шүүхийн бай­гуул­лагад итгэхгүй байгаагаа илэр­хийлж байна. Эхнэр Евгения Кара Мурза Франц, Израилын шин­жил­гээ­ний хүрээлэн рүү дээж явуулж шинжлүүлэхээр төлөвлөөд байгаа гэнэ. Өөрийн орны хүмүүст итгэхгүй байгаа нь ч учиртай. Түүнийг 2015 онд хордох үед нь ч тэдэнд хэн ч итгээгүй байх юм. 

Өөрөөр хэлбэл,  хорд­логын шалтгаантайгаар эм­нэлэгт хүргэгдэх үедээ 33 настай залуу бөөрний дутагдалд орж,  цуснаас нь дээж авч шинжлэхэд  хүнд металл өндөр агууламжтай гарч байжээ. Түүний дараа ОХУ-ын Мөрдөх хороонд хэн нэгэн санаатайгаар хордуулсан эсэхийг шалгах хүсэлт тавьсан ч, хэрэгсээгүй байна. Харин Кара Мурза эхнэрийнхээ хамт хэн нэгэн өөрийг нь хорлосон гэдэгт бат итгэлтэй байжээ. Тэрбээр өөрөө  ч энэ тухайгаа хэвлэлд өгсөн ярилцлагадаа илэрхийлж байсан аж.

Тухайлбал, 2016 онд өгсөн ярилцлагадаа “Би 33 настай эрүүл саруул залуу байлаа. Гэтэл 24 цагийн дотор л миний бүх дотор эрхтнүүд ар араасаа өвдөж эхэлсэн. Зүгээр нэг тохиолдлын хэрэг биш байгаа биз дээ”  хэмээж, өөрийг нь улс тө­рийн зорил­гоор хор­дуулж алах санаар­хал хэн нэ­гэнд бий гэдэгт “ямар ч эр­гэл­зээ­гүй” ит­гэл­тэй бай­­гаа­­гаа илэр­хийлж байсан удаа­­тай. Ямартай ч, ард­чил­лын төлөө тэмцэгч, сэтгүүлч Кара Мурза  энэ сарын 2-нд орон нут­гийн эмнэлэгт хүргэгдсэнээс хойш амьс­га­лын аппараттай үхэл амьд­ралын заагт байгаа аж.  Түүний эхнэр Евгения Кара Мурза нөх­рийн­хөө талаар ярих­даа “Албан ёсны шин­жил­гээ­­ний хариу нь үл мэ­дэг­дэх бодист хорд­сон гэж гар­сан. Биеийн бай­дал нь хүнд бай­гаа ч, тогт­вор­жиж байна” гэсэн байна.