Хойд Солонгосын удирдагч Ким Жон Уны эцэг нэгт ах Ким Жон Нам Малайзын Куала Лампур хотын олон улсын нисэх онгоцны буудалд учир битүүлгээр хордож нас барсан хэрэг дэлхий дахинаа дуулиан тарьж байна. Тэгвэл уг хэрэгтэй холбоотойгоор Малайз, Умард Солонгос хоёр улсын харилцаа ч хурцдаж эхэллээ.

 

Тодруулбал, Ким Жон Намын хэргийг мөрдөн шалгаж буй Малайзын талыг “Дайсагнагч хүчнүүдтэй хуйвалдаж байна. Тэд Ким Жон Намын үхлийн шалтгааны талаархи үнэнийг нуун дарагдуулна” хэмээн  Умард Солонгосоос  Малайзад суух Элчин сайд Кан Чол  өнгөрөгч долоо хоногт хэлсэн нь   тус улсын эрх баригчдын дургүйцлийг хүргэжээ. 

 

Улмаар энэ мэдэгдэлдээ тайлбар хийхийг шаардан Кан Чолыг Гадаад хэргийн яамны байран дээр дуудсан гэнэ. Үүгээр ч зогсохгүй тус улсаас Умард Солонгост суух Элчин сайдаа эгүүлэн татна гэдгээ хатуухан мэдэгдсэн байна. Жон Намын үхлийн ард Умард Солонгос бий гэсэн таамаглал газар авч байгаа хэдий ч үүнийг нотлох тодорхой баримт байхгүй байгаа бөгөөд Пхеньян ч одоогоор ямар нэгэн мэдэгдэл хийгээгүй байгаа юм. 

 

 

Малайзын Гадаад хэргийн яамнаас ирүүлсэн мэдээллээр тэд Элчин сайд  Кан Чолыг дуудан ирүүлж, талийгаач Ким Жон Намын аллага Малайзын нутаг дэвсгэрт учир битүүлэг байдлаар гарсан гэдгийг онцлоод,  Малайзын Засгийн газарт үхлийн шалтгааныг тодруулах хууль эрх зүйн хариуцлага бий гэдгийг хатуу мэдэгдсэн гэнэ. Түүнчлэн, тус улсын Засгийн газар Пхеньянд суух Элчин  сайдаа Куала Лампур хотноо дуудаж, яриа хэлэлцээр хийх чиглэл өгчээ.

 

Өмнө нь Умард Солонгосын Засгийн газраас Ким Жон Намын цогцсыг эх орон руу нь элдэв шинжилгээ хийлгэлгүйгээр буцаахыг шаардсан удаатай. Тус улсын Элчин сайдын яамны ажилтнууд ч хэрэг гарсны дараа шүүх эмнэлгийн гадна сахин зогсч байсан гэх мэдээлэл байгаа юм.  Харин Малайз тэдний хүсэлтийн хариуд тодорхойгүй байр суурийг илэрхийлснээр ийнхүү хоёр улсын харилцаа хурцдаад байна. 

 

Хойд Солонгосын дөрвөн иргэнийг эрэн сурвалжилж эхэллээ

 

Малайзын цагдаагийн газраас зарласан хэвлэлийн хурлын үеэр Хойд Солонгосын удирдагч Ким Жон Уны эцэг нэгт ах Ким Жон Намыг хөнөөсөн хэргийн сэжигтнүүдийн талаар мэдээлжээ. Улмаар  хэрэг гарсан өдөр буюу энэ сарын 13-нд Малайзыг орхисон Хойд Солонгос гаралтай дөрвөн эрэгтэйг эл хэрэгт холбогдуулан эрэн сурвалжилж эхэлсэн талаар мэдээлсэн байна. Мөн тэдний зургийг олон нийтэд ил болголоо.

 

Малайзын цагдаагийн газрын дарга Нур Рашид Ибрахимын хэлж буйгаар,  дээрх дөрвөн этгээд 33-57 насныхан байжээ.  Тэд энэ сарын 6-нд буюу хохирогч Ким Чен Намтай нэг өдөр Куала-Лампурт очиж, түүнийг амиа алддаг өдөр Малайзаас явсан байна. Малайзын орон нутгийн хэвлэлүүд дээрх дөрвөн сэжигтэн аль хэдийнэ эх орондоо очсон гэж  мэдээлжээ. Ингэхдээ Дубай болон өөр нэг хотоор дамжиж, дөрөв хоногийн дараа Пхеньянд очсон гэж дамжуулж байгаа аж. 

 

Ри Чон Сол Малайзад ямар ажил эрхэлж байсан нь тодорхойгүй

 

Ким Жон Намыг хоёр эмэгтэй хүн хорлосон хэдий ч, эл хэрэгт хэд хэдэн ч хүн оролцсон бололтой. Тодруулбал, эдүгээ цагдаагийн газрынханд баривчлагдсан Хойд Солонгос гаралтай Ри Чон Сол гэгч тус улсад ажиллаж байсан гэдэг нь “бодитой бус” гэдэг нь ил болжээ. Түүний биед Малайзын гадаад ажилтнуудад олгодог тусгай виз байсан гэдэг.  Улмаар түүнд бичсэнээр, Ри  Куала Ламдур хотын эрүүл мэндийн бүтээгдэхүүний чиглэлээр үйл ажиллагаа явуулах компанид ажиллахаар  ирсэн байжээ. Гэтэл виз дээр нэр дурьдагдсан тус компанийн захирал өчигдөр хэвлэлд тодруулга өгөхдөө,  дөрвөн жилийн өмнө Хойд Солонгос танил нь өөрийнхөө үеэлийг танилцуулж,  улмаар виз гаргахад нь тусалж байснаа хүлээжээ.

 

Гэхдээ бодит байдалд компанидаа ажиллуулж, цалин олгож, дэмжлэг үзүүлж байсан удаагүй гэж мэдэгдсэн байх юм. Тухайн үед танил нь Ри Чон Солыг Малайз, Умард Солонгосын хооронд дал модны тосны худалдаа эрхлэх гэж буйг учирлаж байжээ. Ри Куала Лампур хотын зах хэсэгт эхнэр, хувийн сургуульд суралцдаг охиныхоо хамтаар амьдардаг бөгөөд өөр замаар ч гэсэн амьжиргааныхаа зардлыг олдог байсан гэнэ. Түүний талаар зарим хэвлэлд тагнуул байсан тухай дурьдсан байв.