Замын цагдаагийн алба, Нийслэлийн тээврийн газар болон нийтийн тээврийн үйлчилгээ үзүүлдэг аж ахуй нэгж, байгууллагууд хамтран хөдөлгөөнт хяналтын камерийг том оврын автобусанд байрлуулжээ. Тус ажлыг замын хөдөлгөөний аюулгүй байдлыг хангах зорилгоор хийж байгаа юм байна.

Нийслэлийн хэмжээнд нийтийн тээврийн үйлчилгээ үзүүлдэг нийт 900 гаруй том оврын автобус байдаг аж. Түүнээс эхний ээлжинд 200 автобусанд хөдөлгөөнд камер байрлуулжээ. Цаашид нийт автобус болон такси үйлчилгээ үзүүлдэг тээврийн хэрэгслүүдэд байршуулах гэнэ. Энэхүү хяналтын камерийн тусламжтайгаар нийтийн тээврийн үйлчилгээнд явж байгаа том оврын автобус болон бусад хөдөлгөөнд оролцож буй тээврийн хэрэгслүүдийн хөдөлгөөнд хяналт тавих, гаргасан зөрчлийг баримтжуулан хариуцлага тооцох боломжтой аж.