УИХ-ын чуулганы хуралдаан үргэлжилж байна. Гишүүд Сангийн сайдаас татвартай холбоотой асуудлаар асуулт хариулт авч байна.

Б.Энх-Амгалан: Шатахууны онцгой албан татварыг нэмнэ гэж байна. Энэ иргэдийн амьдралд дарамт болохгүй юу. Жижиглэнгийн үнэ нэмэгдэх үү. Хэрвээ тэгвэл өргөн хэрэглээний бараа дагаад өснө шүү дээ. Мөн Хадгаламжийн хүүнээс татвар авахаар болж байна. Нийт иргэдийн 70 орчим хувийн хадгаламжаас татвар авна гэж байна. Иргэд мөнгөө татчихвал яах вэ. Банк санхүүгийн байгууллага эрсдэлд орох юм биш биз.

Б.Чойжилсүрэн: Валютын сан судалгаа гаргаад, шатахууны нэг литрийн үнэ танай улсад 65 цент, ОХУ-д 67 цент, БНХАУ-д нэг ам.доллар байна гэсэн судалгаа гаргасан байна лээ. Шатахууны хилийн үнэ, онцгой албан татварыг нэмнэ гэдэг нь шатахууны үнэ шууд өсөхөд нөлөөлөхгүй. Өөрөөр хэлбэл, жижиглэнгийн үнэд нөлөөлөхгүй байх гэсэн найдлагатай байгаа.

Хадгаламж татахаар эрсдэл гарахыг үгүйсгэхгүй. Гэхдээ Монголбанк болон манай яамнаас ажлын хэсэг гарч судалсан. Хадгаламжийнхаа 10 хувийг төлөх сэтгэл байгаа гэж найдаж байна. Бизнес эрхлэгчид маань ашгаа бодох байх. Түүнээс биш мөнгөө хав дараад зүгээр суухыг хүсэхгүй болов уу.