“Алтан хүү” даамын клубээс зохион байгуулдаг чансааны оноо олгох цувралын энэ оны хоёр дахь тэмцээн Спортын төв ордонд энэ сарын 7-9-ний өдрүүдэд боллоо.  “Нартын голомт” ХХК-ийн нэрэмжит энэхүү тэмцээнд 56 даамчин өрсөлдөж,  ОУИМ, гавьяат тамирчин Д.Эрдэнэбилэг тэргүүллээ.

Энэ сард Ташкент хотноо болох Ази тивийн АШТ-ий өмнөх бэлтгэл болсон уг тэмцээнд оролцогчдын дөрөвний нэг нь олон улсын цолтнууд байв. Швейцарь системээр есөн өрөг тоглож дүнгээ гаргахад ОУИМ Д.Эрдэнэбилэг боломжит 18 онооноос 15-ыг авсан амжилтаар түрүүлж, ДДХМ Ц.Сүхбат, ОУИМ Г.Ганжаргал, ДДХМ Ц.Хашчулуун, спортын мастер Ц.Эрдэмбилэг нар удаалсан байна.

Харин тэмцээний эмэгтэйчүүдийн ангилалд спортын мастер ОУМ М.Одгэрэл, ОУИМ М.Нямжаргал, ахмад даамчдаас спортын мастер Л.Гансүх, Д.Дорж, хөвгүүдээс спортын мастер Ц.Чинзориг, охидоос ДДХДМ Б.Мишээл нар тэргүүлж, дэд мастер С.Болор, I зэргийн тамирчин Э.Сугарсүрэн, Г.Гүнсумъяа нар тусгай шагналын эзэд боллоо.