Монголчууд бидний агуу их өв соёл, монгол морин хуурын эгшиг аялгуу дэлхий дахинаа цуурайтаж, Монголын сонгодог хөгжмийн зэмсэг “Морин хуур” хөгжим маань дэлхийн сонгодог хөгжимтэй хөл нийлүүлэн эгшиглэх болсон сайхан мэдээг уншигч таньтай хуваалцахдаа баяртай байна.

Тодруулбал, Морин хуур хөгжмийг Австри улсын Вена хотноо орших Франц Шубертын нэрэмжит нарийн мэргэжлийн хөгжмийн консерваторийн сургалтын хөтөлбөрт оруулах талаар төсөл хөтөлбөр бичсэн монгол залуу Б.Санжаажав санаснаа биелүүлж чаджээ. Тэрбээр, одоогоос жилийн өмнө буюу 2016 оны есдүгээр сард энэ тухай саналаа Консерваторийн сургалтын алба болон удирдах зөвлөлд гаргаж, түүний саналыг нэг сарын турш хэлэлцжээ. Улмаар Б.Санжаажавын саналыг хүлээн авч, албан ёсоор “Морин хуур”-ын анги нээхээр болжээ.

Улмаар Б.Санжаажавын боловсруулсан морин хуур хөгжмийн дөрвөн жилийн бакалаврын зэргийн сургалтын хөтөлбөр, төлөвлөгөөг тус сургуулийн сургалтын хөтөлбөртэй нийцүүлж илүү боловсронгуй болгож энэ оны хоёрдугаар сард тус сургуулийн удирдлага сургалтын хөтөлбөрийг албан ёсоор баталжээ.

Б.Санжаажав энэ талаар өөрийн цахим хуудсандаа “Монгол Улсаас болон дэлхийн өнцөг булан бүрээс монголын болон гадаадын оюунтнууд Франц Шуберт-ын нэрэмжит консерватори-т нарийн мэргэжлийн хөгжмийн боловсрол эзэмшээд зогсохгүй “Морин хуур” хөгжмөөр бакалаврын зэргийг хамгаалан төгсөх бүрэн боломж нээгдэж буй юм. 

Гадаадын оюунтнуудын хувьд монгол улсын үндэсний хөгжмийг суралцаад зогсохгүй монголын соёл, урлагтай танилцан суралцах боломж нээгдэж байна. Мөн Монгол Улсын аялал жуулчлалын салбарт ч өндөр ач холбогдолтой.

Монгол оюунтнуудын хувьд Авcтри улсын болон Европын сонгодог хөгжмийн түүх соёл, ёс заншилтай танилцахаас гадна хөгжмийн өндөр боловсрол мэдлэгийг олж авах бүрэн боломж нээгдэж, энэ нь эргээд монгол эх орондоо, монголын соёл, урлагийн салбарт нэн шаардагатай боловсон хүчин болон бэлтгэгдэх гарц нээгдэж буйг хэлэхэд таатай байна” хэмээжээ.

Зураг: Франц Шуберт-ын нэрэмжит нарийн мэргэжлийн хөгжмийн консерватори-н захирал хатагтай Даниела Эгг-ийн хамт Франц Шуберт-ын нэрэмжит консерватори-т "Морин хуур"-ын ангийг албан ёсоор нээх хамтын гарын үсэг зурсан эрх, гэрээг хүлээн авч буй нь.