Ойрын өдрүүдэд ихэнх нутгаар дулаарч агаарын хуурайшилт ихсэж, салхи ширүүсэх тул болзошгүй гал түймрийн аюулаас сэрэмжтэй байхыг малчид, тариаланчид, хөдөө орон нутгийн иргэдэд холбогдох албаныхан анхааруулж байна.

Түүнчлэн, Ус цаг уур орчны шинжилгээний газраас ирүүлсэн мэдээллээр энэ сарын 30-наас ирэх сарын 5 хүртэл ихэнхи нутгаар их хэмжээний бороо, нойтон цас орох төлөвтэй байгаа юм.

Тодруулбал, энэ сарын 30-нд баруун аймгуудын нутгийн баруун хэсгээр бага зэргийн бороо, 1-нд баруун аймгуудын ихэнх нутаг, төвийн аймгуудын нутгийн баруун хэсгээр, 2-нд баруун болон төвийн аймгуудын нутгаар, 3-нд ихэнх нутгаар хур тунадас, нойтон цас орно. Салхи 30-нд Алтайн салбар уулсаар секундэд 12-14 метр, 1-3-нд ихэнх нутгаар секундэд 14-16 метр, зарим үед секундэд түр зуур 20-22 метр хүрч шороон болон цасан шуурга шуурна.

Шөнөдөө Хүрэн бэлчир, Дархадын хотгор болон Хангай, Хөвсгөл, Хэнтэйн уулархаг нутгаар шөнөдөө 2 градус хүйтнээс 3 градус дулаан, Их нууруудын хотгор болон говийн бүс нутгаар 9-14 градус, бусад нутгаар 4-9 градус, өдөртөө Дархадын хотгор, Хүрэн бэлчир орчмоор 17-22 градус, Их нууруудын хотгор болон Орхон-Сэлэнгийн сав, говь, талын нутгаар 26-31 градус, бусад нутгаар 21-26 градус дулаан байна. 2-3-нд ихэнх нутгаар эрс сэрүүсэх төлөвтэй байна. Гэвч энэ амралтын өдрүүдэд нийслэлд хотод дулаарах төлөвтэй байгаа тул амралтын хоёр өдрөө агаар салхинд гарч, гэр бүлтэйгээ амарч зугаалан өнгөрүүлж болох нь ээ.