“Олон улсын хөдөлмөрчдийн эв санааны өдөр” өнөөдөр тохиож байгаа билээ. Үүнтэй холбогдуулан МҮЭХ-ноос тайван жагсаал зохион байгуулахаар болжээ. Хамгийн гол нь тайван жагсаал нийслэлээс гадна 21 аймгийн төв талбайд өнөөдөр 12.00 цагт нэгэн зэрэг эхлэх юм байна.  Жагсаалын үеэр Хөдөлмөр нийгмийн зөвшлийн 2017-2018 оны улсын хэлэлцээрийг хэрэгжүүлэхийг Засгийн газраас шаардах ажээ.

Уг хэлэлцээрээр бүх төрлийн татварын хэмжээг өөрчлөх, шинэ татвар бий болгоход түншлэгч талуудтай зөвшилцөх, тэтгэвэр, тэтгэмж, цалин хөлсийг нэмэгдүүлэх асуудлыг эдийн засгийн нөхцөл байдалтай уялдуулан 2018 оны улсын төсөв батлагдахаас өмнө нэмэлт хэлэлцээр байгуулж, шийдвэрлүүлэхээр тусгасан аж.

Мөн эдийн засгийн хүндрэлтэй холбогдуулан аливаа санхүүгийн хөтөлбөрийг хэрэгжүүлэхдээ хүн амын цалин орлого, нийгмийн хамгааллын түвшинг дордуулахгүй байхаар тусгасан. Гэвч 2017 оны төсвийн тодотголоор долоон төрлийн татвар болон нийгмийн даатгалын шимтгэлийг нэмэх болсон. Энэ нь иргэдийн амьдралд сөргөөр нөлөөлөх магадлалтай юм. Үүнийг эсэргүүцэж МҮЭХ-ноос Засгийн газарт зургаан удаа шаардлага, мэдэгдэл хүргүүлсэн ч хариу ирүүлэхгүй байгаа учраас ийн жагсахаар болсон байна.