“Тоёота мотор” корпораци гурав дахь жилдээ Үндэсний их баяр наадмын албан ёсны түншээр ажиллаж байна. Энэ хүрээнд үндэсний бөхийн түрүүг энэ оны загвар болох Ланд 200 машинаар шагнаж урамшуулахаар болжээ. Энэ талаар Тоёота мотор корпорацийн Монгол дахь төлөөлөгчийн газрын захирал Цүёоши Авайгаас тодрууллаа. 

 

-Тоёота корпораци Үндэсний баяр наадмын албан ёсны түншээр ажиллаж байгаа гэсэн. Энэ хүрээнд бөхийн барилдааны түрүү магнай бөхийг шинэ загварын Ланд-200 машинаар шагнахаар болжээ. Энэ талаар тодруулаач?

 

-Тоёота корпораци наадмын үйл ажиллагаанд албан ёсны түншээр гурав дахь жилдээ  ажиллаж байна. Албан ёсны түншийнхээ хүрээнд бид наадмын хүчит бөхийн барилдааны түрүү бөхийг бартаат замын хаан гэгддэг Ланд 200 маркийн машинаар шагнаж урамшуулах юм. Бөхийн барилдаан дууссаны дараа буюу энэ сарын 13-ны өдрийн 10.30 цагт Чингисийн талбайд  түрүү бөхийн бай шагналыг гардуулах ёслолын ажиллагаа болно. Мөн тусгайлан тайз засч, наадамчиддаа зориулсан урлаг соёлын үйл ажиллагааг зохион байгуулах гэж буйгаа дуулгахад таатай байна. 

 

-Энэ оны түрүү бөхийн шагнал Ланд-200 маркийн машины гол онцлог нь гэвэл, та юу хэлэх вэ?

 

-Энэ удаагийн түрүү бөхийг шагнах Ланд Крузер-200  Тоёото маркийн машинууд дундаа дэлхий дахинаа хамгийн түгээмэл дэлгэрсэн машины нэг. Тухайлбал, Улаан загалмайн нийгэмлэг, НҮБ-ын холбогдох байгууллагад ч Ланд  Крузер машиныг ашиглаж байна. Тийм ч учраас бартаат замын эзэн гэгдэж, дэлхийд нэр хүндтэй болсон гэж хэлж болно. Тоёото компанийн инженерийн гол баримталдаг зарчим нь эвдрэхгүй машин үйлдвэрлэх. Эвдэрсэн ч гэсэн засчих боломжтой машиныг үйлдвэрлэх юм. 

 

-Нууц биш бол зах зээл дэх үнэ нь хэд вэ?

 

-Японы иэнээр барагцаагаар 9 сая  болно. Цаашдаа Монголын зах зээлд нийлүүлж буй машинууд маань Монгол-Япон улсын хооронд байгуулсан эдийн засгийн түншийн хэлэлцээрийг дагуу гаалын татвар багатайгаар нийлүүлэгдэх байх. 

 

-Монгол наадам хурдан морь, хүчит бөх, сурын харваа гэсэн гурван төрөлтэй. Коёото корпораци тэр дундаас  чухам яагаад үндэсний бөхийг сонгож, түрүү бөхийн бай шагналыг ивээн тэтгэх болов?

 

-Японд ч гэсэн үндэсний бөхийн уламжлал бий. Энэ утгаараа  монгол бөх илүү ойр санагддаг гэж хэлж болно. Манай корпораци монгол бөхийг туйлын хүндэтгэж байгаа гэдгээ юун түрүүнд хэлэх хэрэгтэй. Зүгээр  нэг биеийн тамирын дасгал хөдөлгөөн бус  биеийн хүч тамир, ур ухаан, мэхээ уралдуулан барилддаг учир хүндэтгэж байгаа юм. Хоёрдугаарт, Монголын үндэсний бөх бусдыгаа бодвол илүү нийтлэг спорт гэж би ойлгодог. Ланд Крузер машин ч гэсэн зөвхөн бат бөх машин биш. Уян хатан байгалийн аль ч нөхцөл байдалд дасан зохицохуйц байдлаар үйлдвэрлэсэн машин шүү дээ.