ХХААХҮЯ-ны Мал аж ахуйн үйлдвэрлэлийн асуудал хариуцсан ахлах мэргэжилтэн П.Ганхуягт холбогдох авлига, албан тушаалын хэргийг Баянзүрх дүүргийн Эрүүгийн хэргийн анхан шатны шүүх маргааш хэлэлцэхээр товложээ.

Тэрбээр эл яамны Мал аж ахуйн бодлогын хэрэгжилтийг зохицуулах газрын ахлах мэргэжилтнээр ажиллаж байхдаа “Нью фоос” компанийн захирал Ц.Лхагвасайханаас 25 сая төгрөгийн хахууль авч, компанийг нь тендерт ялуулсан хэрэгт холбогдсон юм.

Тус яам 2013 онд Малын тэжээл үйлдвэрлэлийн тоног төхөөрөмж нийлүүлэх 500 сая төгрөгийн өртөгтэй ажлын гүйцэтгэгчийн сонгон шалгаруулалт зарласан байдаг. Уг тендерт “Нью Фоос” компани оролцохдоо БНСУ-аас Монгол орны цаг агаарын эрс тэс уур амьсгалд нийцсэн, стандартын шаардлага бүрэн хангасан тоног төхөөрөмж нийлүүлэхээр шалгарсан юм. Гэвч БНХАУ-д үйлдвэрлэсэн зэвэрсэн, өвлийн улиралд ажиллах боломжгүй, стандартын шаардлагад нийцээгүй 15 ширхэг тоног төхөөрөмж нийлүүлжээ.