Арлын Япон оронд ид хаваа гайхуулж, Японы сүмо бөхийг дэлхий дахинд таниулж байсан Их аварга Д.Дагвадоржийг мэдэхгүй хүн үгүй. Тэрбээр, “Монголчууд дэлхийн хүмүүс шүү” гэдгийг Арлын Япон орон цаашлаад дэлхий дахинд таниулсан гавьяатай нэгэн. Тэгвэл Их аварга өнөөдөр нэгэн гэнэтийн мэдээг монголчууддаа дуулгалаа. Өнөөдрөөс цахим ертөнцөөр Манлай баатар Дамдинсүрэнгийн хүү Долсон вангийн зээ охин Лхамжав гэх буурай хүйтэн хонгилд амьдарч яваа тухай видео нийтлэл гарсан. Их хэлмэгдүүлэлтэд өртөж, ар гэрийнхэнийг нь хүртэл хэлмэгдүүлэлтийн хар шуурга нөмөрсөн тухай news.mn сайтын сэтгүүлч Л.Нарантөгсийн бэлтгэсэн уг видео нийтлэлийг Их аварга олж үзсэн аж.

Улмаар өөрийн фэйсбүүк хуудсандаа  “Манлай баатар Дамдинсүрэнгийн хүү Долсон вангийн зээ охин Лхамжав гуайд өөрийн зүгээс Эх үрсийн баярыг тохиолдуулан Дархан хотод хоёр өрөө байр бэлэглэж байгааг уламжлаарай.Эх оронч миний шүтээн өвөг дээдсийн сүнс амирлах болтугай” хэмээн жиргэжээ. Аваргын энэ үйлдэл олон ч хүмүүсийн талархлыг хүлээлээ. Төрөөс нэг ч төгрөгийн дэмжлэг авдаггүй атлаа салбар бүрт өөрийн бизнесээ амжилттай эрхэлж яваа энэ эрд алдсан зүйл ч олон бий.

Хэсэгтээ л хатуу дарсанд дурлаж, зодоон цохион хийсэн ч монголын ард түмэн түүнд хайртай хэвээр байдаг. Ард түмний тэр их хайр талархлыг зөв хүртэж, бор дарснаас бүр татгалзсан Их аварга энэ удаад ч ард түмний хайрыг татсан шийдвэр гаргажээ. Дашрамд дурьдахад, Их аварга холимог тулааны спортыг Монголд хөгжүүлэхээр зорьж буй залуусыг дэмжиж “Зэв” хэмээх клубыг дэмжиж ажиллахаа ч саяхан мэдэгдсэн билээ. Их аваргадаа баярлалаа. Өвөг дээдсийн сүнс өнө мөнхөд таныг ивээг хэмээн уншигчдынхаа өмнөөс хүсье. Уншигч та сэтгүүлч Л.Нарантөгсийн бэлтгэсэн уг нэвтрүүлгийг доорх бичлэгээс үзнэ үү.